Nirnayasindhu 7.2-3

7.2-3

iti atra ca piṇḍarahitaṃ śrāddhaṃ kuryāt- “ ayanadvitaye
śrāddhaṃ viṣuvadvitaye tathā | yugādiṣu ca sarveṣu piṃḍadānavivarjanāhate” || iti hemādrau pulastyavacanāt || atra rātribhojane prāyaścittamṛgvidhāne- “rātrau bhukte vatsare tu manvādiṣu yugādiṣu | abhisvavṛṣṭiṃ mantraṃ ca japedaśanapātake ” iti || aparārke yamaḥ-“ kṛtopavāsāḥ salilaṃ ye yugādidineṣu ca | dāsyaṃtyannādisahitaṃ teṣāṃ lokā mahodayāḥ ” iti
vaiśākhe malamāse sati tatraiva yugādiḥ kāryaḥ | tathā ca hemādrau ṛṣyaśṛṃgaḥ-“ daśaharāsu
notkarṣaścaturṣvapi yugādiṣu | upākarmaṇi cotsarge hyetadiṣṭaṃ vṛṣāditaḥ ” iti || etaddaśaharādikaṃ vṛṣādisaṃkrame iṣṭam || ‘kanyācaṃdre vṛṣe ravau ’ ityādi sauramāsokterityarthaḥ
kālādarśepi- ‘ abdodakuṃbhamanvādimahālayayugādiṣu | ’ iti malamāsakarttavyeṣu parigaṇanācca || mahālayaśabdena maghātrayodaśyucyata iti mādhavaḥ || smṛticaṃdrikāyāṃ tu māsadvaye
kartavyamityuktam- “ yaugādikaṃ māsikaṃ ca śrāddhaṃ cāparapakṣikam | manvādikaṃ tairthikaṃ ca
kuryānmāsadvayepi ca ” iti || aparapakṣaḥ kṛṣṇapakṣaḥ, na tu mahālayaḥ || tasya tatra niṣedhāt | madanaratnepi marīciḥ- “ pratimāsaṃ mṛtāhe ca śrāddhaṃ yatprativatsaram | manvādau ca yugādau ca tanmāsorubhayorapi ” iti || prativatsaraṃ kriyamāṇaṃ kalpādiśrāddhamiti sa eva
vyācakhyau
atra śrāddhākaraṇe prāyaścittam
aṃtra śrāddhākaraṇe prāyaścittamuktamṛgvidhāne-" na yasya dyāvāmantraṃ ca śatavāraṃ tadā japet
yugādayo yadānyūnāḥ kurute naiva cāpi yaḥ " iti || atra samudrasnānaṃ praśastam | taduktaṃ pṛthvīcandrodaye saurapurāṇe-" yugādau tu naraḥ snātvā vidhivallavaṇodadhau | gosahasrapradānasya kurukṣetre phalaṃ hi yat | tatphalaṃ labhate martyo bhūmidānasya ca dhruvam " iti
ayaṃ nirṇayaḥ sarvayugādiṣu boddhavyaḥ | iti yugādinirṇayaḥ
paraśurāmajayantīnirṇayaḥ
iyameva tṛtīyā paraśurāmajayaṃtī | sā pradoṣavyāpinī grāhyā | taduktaṃ bhārgavārcanadīpikāyāṃ skāṃdabhaviṣyayoḥ-“ vaiśākhasya site pakṣe tṛtīyāyāṃ punarvasau | niśāyāḥ prathame yāme
rāmākhyaḥ samaye hariḥ || svoccagaiḥ ṣaḍgrahairyukte mithune rāhusaṃsthite | reṇukāyāstu yo
garbhādavatīrṇo hariḥ svayam "