Smritisaroddhara 1.p202

1.p202

atha yasya janmarāśau janmarkṣe voparāgastasya vidhirucyate | jyotiṣe | horāyāṃ gṛhyate yasya nakṣatre vā niśākaraḥ | prāṇasandehamāpnoti sa vā maraṇamṛcchati || horāyāṃ lagne | mātsye | yasya rāśiṃ samāsādya bhavedgrahaṇasaṃbhavaḥ || tasya snānaṃ pravakṣyāmi mantrauṣadhisamanvitam | candroparāge saṃprāpte kṛtvā brāhmaṇabhojanam || saṃpūjya caturo viprān śuklamālyānulepanaiḥ | pūrvvamevoparāgasya samānīyauṣadhādikam || sthāpayeccaturaḥ kuṃbhānagrataḥ sāgarāniva | gajāśvarathyāvalmīkasaṅgamrahradagokulāt || rājadvārapradeśācca mṛdamānīya nikṣipet | pañcagavyaṃ pañcaratnaṃ pañcatvak pañcapallavam || rocanaṃ padmakaṃ śaṅkhaṃ kuṅkumaṃ raktacandanam | śuktisphaṭikatīrthāmbusitasarṣapaguggulūn || madhukaṃ devadāruṃ ca viṣṇukrāntāṃ śatāvarīm | balāṃ ca sahadevīṃ ca niśādvitayameva ca || etatsarvaṃ vinikṣipya kuṃbheṣvāhāyetsurān || sarvve samudrāḥ saritastīrthāni jaladā nadāḥ | āyāntu yajamānasya duritakṣayakārakāḥ || yo'sau vajradharo deva ādityānāṃ prabhurmataḥ | sahasranayanaste'sau grahapīḍāṃ vyapohatu || mukhaṃ yaḥ sarvvadevānāṃ saptārciramitadyutiḥ | candroparāgasaṃbhūtāmagniḥ pīḍāṃ vyapohatu || yaḥ karmmasākṣī lokānāṃ dharmmo mahiṣavāhanaḥ | yamaścandroparāgotthāṃ grahapīḍāṃ vyapohatu || rakṣogaṇādhipaḥ sākṣānnīlāñjanasamaprabhaḥ | khaḍgahasto'tibhīmaśca grahapīḍāṃ vyapohatu || nāgapāśadharo devaḥ sadā makaravāhanaḥ | sa jalādhipatiścandragrahapīḍāṃ vyapohatu || yosāvindudharodevaḥ pīnākī vṛṣavāhanaḥ | candroparāgapāpāni sa nāśayatu śaṅkaraḥ || trailokye yāni bhūtāni sthāvarāṇi carāṇi ca | brahmaviṣṇvarkarudrāśca dahantu mama pātakam || evamāvāhayetkuṃbhānmantrairetaiśca vāruṇaiḥ | etāneva tathā mantrānsvarṇapaṭṭe vilekhayet || tāmrapaṭṭe'thavā lekhyaṃ navavastre tathaiva ca | mastake yajamānasya nidadhyuste dvijottamāḥ || kalaśāndravyasaṃyuktānnānārūpasamanvitān | gṛhītvā snāpayedgūḍhaṃ bhadrapīṭhoparisthitam || pūrvoktaireva mantraiśca yajamānandvijottamāḥ | abhiṣekaṃ tataḥ kuryurmantrairvāruṇasūktakaiḥ || tataḥ śuklāmbaradharaḥ śuklamālyānulepanaḥ | ācāryyaṃ varayetpaścātsvarṇapaṭṭaṃ nivedayet | ācārryya dakṣiṇāndadyādgodānaṃ ca svaśaktitaḥ || ataūrddhaṃ brahmapūjāṃ tadardhena viśeṣataḥ | pūjayedvastragodānairbrāhmaṇānapi śaktitaḥ || gandhamālyairdhūpadīpaiḥ pūjayediṣṭadevatām | homaṃ caiva prakurvīta tilairvyāhṛtibhistataḥ || nivṛtte grahaṇe sarvaṃ brāhmaṇebhyo viśeṣataḥ || dānaṃ ca śaktito dadyādyadīcchedātmano hitam | sūryyagrahe sūryyanāmayuktānmantrāṃśca kīrttayet || anena vidhinā yastu grahaṇe snānamācaret | na tasya grahaṇe doṣaḥ kadācidapi jāyate