Smritisaroddhara 1.p47

1.p47

caturthyāñcandradarśanam | mithyābhidūṣaṇaṃ kuryāttasmātpaśyenna taṃ tadā | parāśaraḥ—doṣasya śāntaye siṃhaḥ prasenamivi saṃpaṭhet || brahmapurāṇe—vāsudevobhiśastastu niśākaramarīciṣu | sthitaścaturthyāmādyāyāmmanuṣyāṇāṃ patiśca saḥ | tataścaturthyāṃ candrantu prayatnādvīkṣya mānavaḥ | paṭhetpaurāṇikaṃ mantraṃ prāṅmukho vāpyudaṅmukhaḥ | prayatnātpaṭhehityanvayaḥ,ādyāyāṃ śukracaturthyām || mantro viṣṇupurāṇe—siṃhaḥ prasenamavadhīt siṃho jāmbavatā hataḥ | sukumāraka mārodīstava hyeṣaḥ syamantakaḥ | nirṇayāmṛte—bhādrakṛṣṇanavamyāṃ prabodhitāyā devyāāśvayukśuklacaturthyāmabhyaṅgādisaṃskāraiḥ keśānviśodhayet || taduktaṃ devīpurāṇe—bhādrasya kṛṣṇapakṣetu pūjayitvārdrabhepi vā | navamyāṃ bodhayeddevīṃ gītavāditraniḥsvanaiḥ | śuklapakṣacaturthyāṃ tu devīkeśaviśodhanam | prātareva tu pañcamyāṃ snāpayetsalilaiḥ śubhaiḥ| saptamyāṃ patrikāpūjāmaṣṭamyāmapyupoṣaṇam | navamyāṃ pūjayitvā tu balidānaṃ samācaret | daśamyāṃ rathamāropya gītavāditraniḥsvanaiḥ | nagaraṃ bhrāmayeddevīṃ praṇipatya visarjanam | atrāśvinasitacaturthyāṃ keśaviśodhanaprasaṅgāddaśadinakṛtyamuktam