Smritisaroddhara 2.p1.2

2.p1.2

anāhitāgneḥ pretasya pūrṇe'bde bharatarṣabha | dvādaśe'hani ṣaṣṭhe vā tripakṣe vā trimāsi vā | ekādaśepi vā māsi maṅgalye syādupasthite' | ṣaṣṭhe māsītyanvayaḥ | gobhilaḥ | 'dvādaśāhādikāleṣu pramādādanutiṣṭhatām | sapiṇḍīkaraṇaṃ kuryyātkāleṣūttarabhāviṣu' | sāgnikasya kartūrekādaśāhadvādaśāharūpakālaniyama uktaḥ | sāgneḥ pretasya tripakṣaniyamaḥ | yadā pramādāttatra na kṛtaṃ tadā sapiṇḍīkaraṇamuttarabhāviṣu tripakṣādiṣu kāryyamityarthaḥ| yena saha yaṃ sapiṇḍayettamāha viṣṇuḥ| 'saṃvatsarānte pretāya tatpitre tatpitāmahāya tatprapitāmahāya ca brāhmaṇāndai vapūrvvaṃ bhojayediti | viśeṣamāha brahmapurāṇe | 'mṛte pitari yasyātha vidyate ca pitāmahaḥ | tena deyāstrayaḥ piṇḍāḥ prapitāmahapūrvvakāḥ | tebhyastu paitṛkaḥ piṇḍo niyoktavyastu pūrvvavat' | trayāṇāṃ madhye ekenāpi sapiṇḍane pretasya pitṛtvamāha sumantuḥ | 'trayāṇāmapi piṇḍānāmekenāpi sapiṇḍane | pitṛtvamaśnute preta iti dharmo vyavasthitaḥ' | skānde | 'akrameṇa mṛtānāṃ na sapiṇḍīkṛtiriṣyate | yadi mātā yadi pitā bharttā naiṣa vidhiḥ smṛtaḥ' | etanniṣedhakavākyaṃ mātṛpitābhartṛvyatiriktaviṣayamityarthaḥ | kātyāyanaḥ | 'asaṃskṛtau na saṃskāryyau pūrvvau pautraprapautrakaiḥ| pitarantatra saṃskuryyāditikātyāyano'bravīt' | asaṃskṛtau dāhādisaṃskārarahitau, pūrvvau pitāmahaprapitāmahau | asaṃskṛtābhyāmapi tābhyāṃ sapiṇḍanamāha sa eva | 'pāpiṣṭhamapi śuddhena śuddhaṃ pāpakṛtāpi vā| pitāmahena pitaraṃ saṃskuryyāditiniścayaḥ' | pāpiṣṭhandāhādisaṃskārahīnannatu patitantena samaṃ sapiṇḍanapratiṣedhāt | yadāha gautamaḥ |