Smritisaroddhara 2.p1.3

2.p1.3

'pāpakarmaṇā na saṃsṛjeran striyā ca vyabhicāriṇyeti | asati putrāntare pautreṇaiva saṃskāryyaṃ pitāmahamāha kāstyāyanaḥ | ‘pitāmahaḥ pituḥ paścān nidhanaṃ yadi gacchati | pautreṇaikādaśāhādi karttavyaṃ śrāddhaṣoḍaśam | naitatpautreṇa karttavyaṃ putravāṃścetpitāmahaḥ | pituḥ sapiṇḍanaṃ kṛtvā kuryānmāsānumāsikam’ | pituḥ sannihitatvātpūrvaṃ sapiṇḍanaṃ kṛtvā pitāmahaprapitāmahau saṃskuryādityarthaḥ | mātuḥ sapiṇḍane viśeṣamāha śaṅkhaḥ | ‘mātuḥ sapiṇḍīkaraṇaṃ kathaṃ kāryyaṃ bhavetsūtaiḥ| pitāmahyādibhiḥ sārddhaṃ sapiṇḍīkaraṇaṃ smṛtam’| pitāmahyāṃ jīvatyāṃ prapitāmahyādibhiḥ kuryyāt | brahmapurāṇe | ‘mātaryyagre pramītāyāṃ vidyate ca pitāmahī | prapitāmahīpūrvvastu kāryyastatrāpyayaṃ vidhiḥ’ | aputrāyā viśeṣamāha paiṭhīnasiḥ ‘aputrāyāṃ mṛtāyāntu patiḥ kuryātsapiṇḍanam | śvaśrvādibhissahaivāsyāssapiṇḍīkaraṇaṃ bhavet’ | anvārohaṇenaikādinamaraṇe striyāḥ pṛthaksapiṇḍīkaraṇaṃ na kāryyaṃ, bhartuśca kṛte striyā api kṛtaṃ bhavediti | dināntaramṛte putraḥ svapitṛpitāmahīpiṇḍamadhye kuśānantarddhāyaikena mātuḥ sāpiṇḍyaṃ kuryyāt | sarvatra patnyāḥ sāpiṇḍyamekena śvaśureṇa niṣiddhamiti | yamaḥ | ‘patyā caikena karttavyaṃ sapiṇḍīkaraṇaṃ striyāḥ | sā mṛtāhani tenaikyaṃ gatā mantrāhutivrataiḥ’ | śātātapaḥ | ‘mṛtā yānugatā nāthaṃ sā tena saha piṇḍatām | arhati svargavāsepi yāvadābhūtasaṃplavam’ | tathā | ‘tanmātrā tatpitāmahyā tacchvaśrvā vā sapiṇḍatā | āsurādivivāheṣu vinnānāṃ yoṣitāṃ smṛtā’ | tanmātrā tatpitāmahyetyatra tasyā māturmātrā pitāmahyā cetyarthaḥ |