Pujaprakasha 3.p33.2

3.p33.2

viṣvaksenāya naivedyāṃśaḥ kiyān deya ityāhasaṅgrahakāraḥ, viṣvaksenāya dātavyaṃ naivedyasya śatāṃśakam | pādodakaṃ prasādaṃ ca liṅge caṇḍeśvarāya ca || iti | athāntraiva prasaṅgāt mudrālakṣaṇānyucyante | saṅgrahe, arcane japakāle tu dhyāne kāmye ca karmaṇi | tattanmudrāḥ prayoktavyā devatāsannidhāpakāḥ || hastābhyāmañjaliṃ kṛtvā'nāmikāmūlaparvaṇoḥ | aṅguṣṭhau nikṣipetseyaṃ mudrā tvāvāhanī smṛtā || adhomukhī tviyaṃ cetsyāt sthāpanī mudrikā smṛtā | utthitāṅguṣṭhamukhyostu saṃyogātsannidhāpanī || antaḥpraveśitāṅguṣṭhā saiva saṃrodhinī matā | uttānau tu karau kṛtvā prasārya hṛdayasthitau || prasādamudrā vijñeyā sarvadevaprasādinī | hastau tu saṃmukhau kṛtvā muṣṭīkṛtvā vikuñcayet || tayorupari cāṅguṣṭhau nikṣipedvidvataṃ tathā | avaguṇṭhanamudreyaṃ sarvakāmaphalapradā || muṣṭidvayasthitāṅguṣṭhau saṃmukhau ca parasparam | saṃśliṣṭāvucchritau kuryātseyaṃ saṃmukhamudrikā || prasṛtāṅgulikau hastau mithaḥ śliṣṭau ca saṃmukhau | kuryātsvahṛdaye ceyaṃ mudrā prārthanāsaṃjñikā || samastānāṃ devatānāmetāḥ śastāstu pūjane | vāmāṅguṣṭhaṃ tu saṅgṛhya dakṣiṇena tu muṣṭinā || kṛtvottānaṃ tathā muṣṭimaṅguṣṭhaṃ tu prasārayet | vāmāṅgulyastathā śliṣṭāḥ saṃyuktāḥ suprasāritāḥ || dakṣiṇāṅguṣṭhasaṃspṛṣṭā mudrā śaṅkhasya coditā | hastau tu saṃmukhau kṛtvā saṃlagnau tu prasāritau || kaniṣṭhāṅguṣṭhakau lagnau mudrā cakrasya siddhidā | anyonyābhimukhau hastau kṛtvā tu granthitāṅgulī || aṅgulyau madhyame bhūyaḥ saṃlagnau suprasāritau | gadāmudreyamākhyātā parā muktikarī tathā ||