Pujaprakasha 3.p33.1

3.p33.1

evaṃ kriyāyogapathaiḥ pumān vaidikatāntrikaiḥ | arcannubhayataḥ siddhiṃ martyo vindatyabhīpsitām || iti | amantreṇa na vai pūjyaḥ svamantreṇa svamudrayā | svadhyānena sadā pūjyo nānyathā pūjayeddharim || svamūrttiḥ svena mantreṇa pūjyaivāvāhanaṃ vinā | sarvāḥ śilāḥ samabhyarcyaḥ puruṣasūktena nityaśaḥ || āvāhanaṛcā dadyātpūrvaṃ puṣpāñjaliṃ hareḥ | tasyaivonmukhatāprāptyai yāge codvāsane ṛcā || ante puṣpāñjaliṃ dadyāt yāgasaṃpūrttisiddhaye | iti | yāge pūjāyām | udvāsane ṛcā, udvāsanavihitayā ṛcā pujānte puṣpāñjaliṃ dadyādityarthaḥ | athāṣṭākṣarapūjāvidhirnarasiṃhapurāṇe, aṣṭākṣareṇa deveśaṃ narasiṃhamanāmayam | gandhapuṣpādibhirnityamarcayedacyutaṃ naraḥ || jñeyaścāṣṭākṣaro mantraḥ sarvapāpaharaḥ paraḥ | sarvaduḥkhaharaḥ śrīmān sarvakāryakaraḥ śubhaḥ || aṣṭākṣarasya mantrasya ṛṣirnārāyaṇaḥ smṛtaḥ | chandaśca devī gāyatrī paramātmā ca devatā || gandhapuṣpādisakalamanenaiva nivedayet | anenaivārcito viṣṇuḥ prīto bhavati tatkṣaṇāt || kiṃ tasya bahubhirmantraiḥ kiṃ tasya bahubhirmakhaiḥ | oṃ namo nārāyaṇāyeti mantraḥ sarvārthasādhakaḥ || smṛtyarthasāre, strīśūdrāṇāṃ ca bhavati nāmnā vai devatārcanam | sarve cāgamamārgeṇa kuryurvedānusāriṇaḥ || gurūktena prakāreṇa vedabāhyena nārcayet | pūjānte puṣpasamarpaṇe viśeṣa uktaḥkūrmapurāṇe, dhyātvā praṇavapūrvaṃ tu devatāṃ ca samāhitaḥ | namaskāreṇa puṣpāṇi vinyasecca pṛthak pṛthak || pūjānte kartavyatoktā tatraiva, nivedayīta cātmānaṃ viṣṇave'mitatejase | tadātmā tanmanāḥ śāntastadviṣṇoriti mantrataḥ || iti |