Subodhinipaddhati 42.1

42.1

etāścaturthyantanamontamantraiḥ sampūjya prārthayet
mātaraḥ sarvabhūtānāṃ sarvakalyāṇahetavaḥ
pūjitā bhaktitaḥ sarvā mama rakṣantu bālakam
tataḥ "kārtikeyāya nama" iti pādyādibhiḥ sampūjya prārthayet
kārtikeya mahābāho gaurīhṛdayanandana
kumāraṃ rakṣa me prītaḥ kārtikeya namo'stu te
tato "viṣṇave nama" iti pādyādibhiḥ sampūjya prārthayet
trailokyapūjita śrīmansadā vijayavarddhana
śānti kuru gadāpāṇe nārāyaṇa namo'stu te
tataḥ—
iyaṃ yena dhṛtā kṣoṇī hataśca mahiṣāsuraḥ
tīkṣṇadhārāya śuddhāya tasmai khaṅgāya te namaḥ || iti khaḍgam
puṇyastvaṃ śaṅkha puṇyānāṃ maṅgalānāṃ ca maṅgalam
viṣṇunā vidhṛto'si tvamataḥ śāntiṃ prayaccha me || iti śaṅkham
manthāna mandaro'si tvaṃ mathitaḥ sāgarastvayā
ato mamāsya bālasya matha vighnaṃ namo'stu te
iti manthānam
vaṃśaṃ varddhaya me vaṃśa govindasya sadā priya
rakṣāṃ me kuru bālasya vaṃśarāja namo'stu te || iti vaṃśam
tato mahāṣaṣṭhīṃ pūjayet | praṇavena prāṇāyāmaṃ vidhāya, ṣām̐ ṣīṃ
ṣūmityādinā ṣaḍaṅgaṃ vidhāya, prasannavadanāṃ caturbhujāṃ pītavastrāvṛtāṃ
dakṣiṇe dhṛtamanthānāṃ vāme nīlotpaladharāṃ sarvālaṅkārabhūṣitāṃ dhyātvā, aṣṭadale pratimādau vā āvāhayet
āyāhi varade devi mahāṣaṣṭhīti viśrutā
śaktirūpeṇa me bālaṃ rakṣa jāgara vāsare
evamāvāhya pratiṣṭhāṃ kṛtvā, "idaṃ pādyaṃ mahāṣaṣṭhyai namaḥ” evaṃ
pādyādyupacārairabhyarcya, puṣpāṇyādāya—
jaya devi jaganmātarjagadānandakāriṇi
prasīda mama kalyāṇi mahāṣaṣṭhi namo'stute
iti triḥ sampūjya, akṣatadhūpadīpanaivedyairbahuvidhairabhyarcya praṇamet
devatānāmṛṣīṇāṃ ca manuṣyāṇāṃ ca vatsale
amuṃ mama śiśuṃ rakṣa mahāṣaṣṭhi namo'stu te
tato bālakasamarpaṇam
gauryāḥ putro yathā skandaḥ śiśuḥ saṃrakṣitastvayā
tathā mamāpyayaṃ bālo rakṣatāṃ ṣaṣṭhike sadā