Shraddhacandrika (Divakarabhatta) 3.p4.1

3.p4.1

ekapāke nivasataṃ pitṛdevadvijārttanam | ekaṃ bhavedvibhaktānāṃ tadeva syādgṛhe gṛhe || avibhaktānāmekayajñānāṃ brahmayajñādi pṛthageva bhavati | pṛthagapyekapākānāṃ brahmayajño dvijanmanām || agnihotraṃ surārcā ca sandhyā nityaṃ bhavettathā || ityāśvalāyanokteḥ | yadā vibhaktāḥ saṃsṛṣṭā bhrātarastadā jyeṣṭha eva devayajñādīnkuryāt | homānnadānarahitaṃ na bhoktavyaṃ kadācana | avibhakteṣu saṃsṛṣṭeṣvekenāpi kṛtaṃ kṛtam || iti vyāsavacanāt | saṃsṛṣṭeṣvityuktatvāttādṛśeṣvasaṃsṛṣṭeṣu pṛthageva bhavanti | tathācāśvalāyano'pi-vasatāmekapākena vibhaktānāmapi prabhuḥ | ekastu caturo yajñānkuryādvāyajñapūrvakān || avibhaktā vibhaktā vā pṛthakpākā dvijātayaḥ | kuryuḥ pṛthakpṛthagyajñānbhojanātprāgdine dine || iti | paiṭhīnasiḥvibhaktaistu pṛthakkāryaṃ pratisaṃvatsarādikam | ekenaivāvibhakteṣu kṛtaṃ sarvaistu tatkṛtam || sapiṇḍīkaraṇāntāni śrāddhāni vibhāge satyapyagraja eva kuryāt | tathā calaghuhārītaḥ, sapiṇḍīkaraṇāntāni yāni śrāddhāni ṣoḍaśa | pṛthaṅnaiva sutāḥ kuryuḥ pṛthagdravyā api kvacit || iti | uśanā apinavaśrāddhaṃ sapiṇḍatvaṃ śrāddhānyapi ca ṣoḍaśa | ekenaiva tu kāryāṇi saṃvibhaktadhaneṣvapi || sapiṇḍanottaraṃ vyāsaḥ, arvāk saṃvatsarāt jyeṣṭhaḥ śrāddhaṃ kuryātsametya tu | ūrdhvaṃ sapiṇḍīkaraṇāt sarve kuryuḥ pṛthak pṛthak || iti | evaṃ ca sati dvādaśāhādiṣu sapiṇḍane kriyamāṇe'numāsikodakumbhaśrāddhāni vibhaktānāṃ pṛthak pṛthagbhavanti | maghāśrāddhaṃ mavibhaktā api pṛthakkuryurityadarśi prāk |