Shraddhacandrika (Divakarabhatta) 3.p4.2

3.p4.2

avibhaktabhrātṛṇāṃ yugapattīrthaprāptau jyeṣṭha eva tīrthaśrāddhaṃ kurvīta bhedena prāptau bhinnameva | evaṃ darśagrahaṇayugādiśrāddhamavibhakteṣu jyeṣṭhasyaiva | kecittu-avibhaktena putreṇa pitṛmedho mṛtāhani | deśāntare pṛthakkāryo darśaśrāddhaṃ tathaiva ca || iti yamavacanena deśāntaravāsināmavibhaktabhrātṝṇāṃ darśaśrāddhādikaṃ bhinnaṃ bhavatītyāhuḥ | ācāro'pi śiṣṭānāmevameva | kecittvasya vacanasya cintyatvaṃ prāhuriti dik | atha jīvatpitṛkasya śrāddhādhikāraḥ | kātyāyanaḥ— sapituḥ pitṛkṛtyeṣu adhikāro na vidyate | laugākṣirapi— darśaśrāddhaṃ gayāśrāddhaṃ śrāddhaṃ cāparapākṣikam | na jīvatpitṛkaḥ kuryāttilaiḥ kṛṣṇaiśca tarpaṇam || iti | kraturapi— aṣṭakādiṣu saṅkrāntau manvādiṣu yugādiṣu | candrasūryagrahe pāte svecchayā pūjyayogataḥ || jīvatpitā naiva kuryācchrāddhaṃ kāmyaṃ tathākhilam | iti | kāmyam— revatīṣu tathā raupyamaśvinīṣu turaṅgamān | śrāddhaṃ kurvaṃstathāpnoti bharaṇīṣvāyuruttamam || tasmātkāmyāni kurvīta ṛkṣeṣveteṣu mānavaḥ | iti mārkaṇḍeyādivacanapraṇītam | pūjyayogataḥ=alabhyayoganimittakaḥ | ādinā piṇḍapitṛyajñagrahaṇam | ata eva piṇḍapitṛyajñaṃ prakramya— āpastambaḥ--yadi jīvatpitā na dadyādāhomātkṛtvā viramediti | keṣucicchrāddheṣu tvadhikāro maitrāyaṇīyapariśiṣṭe-ānvaṣṭakyaṃ gayāprāptau satyāṃ yacca mṛte'hani | mātuḥ śrāddhaṃ sutaḥ kuryātpitaryapi ca jīvati || ānvaṣṭakyaṃ=mahālayāntargatanavamyāṃ kriyamāṇaṃ mātṛśrāddham | gayāprāptiḥ prāsaṅgikī na buddhipūrvikā | gayāṃ prasaṅgato gatvā mātṛśrāddhaṃ samācaret | iti vacanāt |