Shraddhamanjari (Bapubhatta Kelakara) 6.1.22

6.1.22

gadādharaṃ smaredbhaktyā śrāddhasāṅguṇyahetave || iti
saṃkaṭe'nye'pi śrāddhānukalpā uktā nirṇayasindhau bṛhannāradīyedravyābhāve dvijābhāve annamātraṃ tu pācayet
paitṛkeṇa tu sūktena homaṃ kuryādvicakṣaṇaḥ
sarvābhāve vanaṃ gatvā kakṣāmūlapradarśakaḥ
sūryādilokapālānāmidamuccaiḥ paṭhiṣyati
na me'sti vittaṃ na dhanaṃ na cānyacchrāddhopayogi svapitṛnnato'smi
tṛpyantu bhaktyā pitaro mayaitau bhujau kṛtau vartmani mārutasya
gatvā'raṇyamamānuṣyamūrdhvabāhurvirautyadaḥ
niranno nirdhano devāḥ pitṝṇāmanṛṇaṃ kṛthāḥ
kakṣaṃ vā pradahetkāle'thavā dadyātphalādikam
athavā śrāddhadivase bhavenniśanaḥ svayam
gatvā'thavā mahāraṇye kakṣāmūlaṃ pradarśayet
dakṣiṇāsyo rudedevamūrdhvabāhuḥ samāhitaḥ
na me dhanaṃ na cānnaṃ bhoḥ pitaraḥ sarvasākṣiṇaḥ
prāpnudhvamatulāṃ tṛptiṃ kakṣāmūlapradarśanāt
abandhyaṃ taddinaṃ neyaṃ yena kenāpi karmaṇā
pūrṇaṃ karoti bhagavānbhaktyā bhaktajanāśrayaḥ
tatastu tarpaṇaṃ kāryaṃ śrāddhāṅgaṃ vidhicoditam
anyathā śrāddhavaiguṇyamaṅgahāninimittataḥ || iti
adravyo'pi yathāśakti kuryādevāṣṭakāṃ budhaḥ
yo'śaktika(yo hyaśakta?)stathā kartuṃ dāridryeṇāṣṭakāmimām
saṃpradadyādanaḍuhe tṛṇānyapyathavā'gninā
gulmamekaṃ dahedevaṃ me'ṣṭakā tviti cintayan
aṣṭakāsamaye jīvannantvaivānaṣṭako bhavet
atha kṣayāhaśrāddham | tatsvarūpamāha nirṇayasindhau vyāsaḥmāsapakṣatithisapṛṣṭe yo yasminmriyate'hani
pratyabdaṃ tu tathābhūtaṃ kṣayāhaṃ tasya taṃ viduḥ