Tirthacintamani 10.p12

10.p12

yatrākṣayavaṭo nāma triṣu lokeṣu viśrutaḥ | yatra dattaṃ pitṛbhyastu bhavatyakṣayamityuta || mahānadyāmupaspṛśya tarpayet pitṛdevatāḥ | tenākṣayān pitṝn lokān kulañcaiva samuddharet || tato brahmasaro gacchedvrahmāraṇyopaśobhitam | brahmalokamavāpnoti prabhātāmeva śarvvarīm || brahmaṇā tatra sarasi yūpaḥ puṇyaḥ prakalpitaḥ | yūpaṃ pradakṣiṇaṃ kṛtvā vājapeyaphalaṃ labhet || tato gaccheta rājendra dheṇukaṃ lokaviśrutam | ekarātroṣito yatra prayacchettiladhenukām || sarvvapāpavimuktātmā somalokaṃ vrajeddhruvam | tatra citraṃ mahārāja adyāpi mahadadbhutam || kapilā sahavatsā vai parvvate vicaratyuta | savatsāyāḥ padāni sma dṛśyante'dyāpi tatra vai || teṣu teṣu tu rājendra padeṣu nṛpasattama | yatkiñcidaśubhaṃ karmma tatpraṇaśyati bhārata || tato gṛdhravaṭaṃ gacchet sthānaṃ devasya dhīmataḥ | snāyīta (?) bhasmanā tatra abhigamya vṛṣadhvajam || brāhmaṇānāṃ bhavedvīra vrataṃ dvādaśavārṣikam | itareṣāntu varṇānāṃ sarvvaṃ pāpaṃ praṇaśyati || udyantañca tato gacchet parvvataṃ gītanāditam | sāvitryāstu padaṃ tatra dṛśyate bharatarṣabha || tatra sandhyāmupāsīta brāhmaṇaḥ saṃśitavrataḥ | upāsīnā bhavet sandhyā tena dvādaśavārṣikī || yonidvārañca tatraiva vidyate bharatarṣabha | tatrābhigamya mucyeta puruṣo yonisaṅkaṭāt || śukla kṛṣṇāvubhau pakṣau gayāyāṃ yo vasennṛpaḥ | punātyāsaptamañcaiva kulānyatra na saṃśayaḥ || eṣṭavyā bahavaḥ putrā yadyeko'pi gayāṃ brajet | yajeta vāśvamedhena nīlaṃ vā vṛṣamutsṛjet || tataḥ phalguṃ brajedrājan tīrthasevī narādhipaḥ | aśvamedhamavāpnoti siddhiñca paramāṃ labhet || tato gaccheta rājendra dharmapṛṣṭhaṃ mahāphalam | tatra dharmo mahārāja nityamāste yudhiṣṭhira || abhigamya tatastatra vājimedhaphalaṃ labhet | tato gaccheta rājendra brahmaṇastīrthamuttamam || tatrādhigamya rājendra brahmāṇaṃ bharatarṣabha | rājasūyāśvamedhābhyāṃ phalamāpnoti mānavaḥ