Tirthacintamani 13.p30

13.p30

bhīṣmaḥ piṇḍaṃ dadau bhūmau nādhikāraḥ kare yataḥ | śāntanuḥ prahasaṃstuṣṭaḥ śāstrārthe niścalo bhavān || trikāladṛṣṭirbhavatu ante viṣṇuśca te gatiḥ | icchayā maraṇañcāstu ityuktvā muktimāgataḥ || rāmo rudrapade ramye piṇḍārpaṇakkṛtodyamaḥ | pitā daśarathaḥ svargāt prasāryya karamāgataḥ || nādāt piṇḍaṃ kare rāmo dadau rudrapade tataḥ | śāstrārthātikramāṅgītaṃ rāmaṃ daśaratho'bravīt || tārito'haṃ tvayā putra rudraloko'hyabhūnmama | pade piṇḍapradānena haste tu svargatirna hi || labdha rājyaṃ ciraṃ kṛtvā pālayitvā prajādikam | yajñān sadakṣiṇān kṛtvā viṣṇulokaṃ gamiṣyasi || sahā'yodhyājanaiḥ sarvvaiḥ kṛmikīṭādibhiḥ saha | ityuktvā daśarathaḥ putraṃ rudralokaṃ paraṃ yayau | gayāśirasi yaḥ piṇḍaṃ yeṣāṃ nāmnā sunirvvapet | narakasthā divaṃ yānti svargasthā mokṣamāpnuyuḥ || gayāśirasi yaḥ piṇḍaṃ śamīpatrapramāṇataḥ | kanda-mūla-phalādyairvā dadyāt svargaṃ nayet pitṝn || padāni yatra dṛśyante viṣṇvādīnāṃ tadagrataḥ | śrāddhaṃ kṛtvā sapiṇḍañca teṣāṃ lokaṃ nayennaraḥ