Tirthacintamani 3.p40

3.p40

1[apsarogaṇasaṅgītaiḥ supto'sau pratibudhyate | haṃsa-sārasayuktena vimānena sa gacchati || tataḥ svargāt paribhraṣṭaḥ kṣīṇakarmā divaścyutaḥ | suvarṇamaṇimuktāḍhyo jāyeta vipule kule || tathā, — gaṅgāyamunayormadhye karīṣāgnintu dhārayet | ] ahīnāṅgo hyarogaśca pañcendriyasamanvitaḥ || yāvanti romakūpāni tasya gātre tu dhīmataḥ | tāvadvarṣasahasrāṇi svargaloke mahīyate || tataḥ svargāt paribhraṣṭo jambudvīpapatirbhavet | sa bhuktvā vipulām bhogān tattīrthaṃ labhate punaḥ || tathā, — yastu dehaṃ nikṛtya svaṃ śakunibhyaḥ prayacchati | vihagairupabhuktasya śṛṇu tasyāpi yatphalam || śataṃ varṣasahasrāṇāṃ somaloke mahīyate | tasmādapi paribhraṣṭo rājā bhavati dhārmikaḥ || guṇavān rūpasampanno vidvāṃśca priyavādakaḥ | bhuktvā tu vipulām bhogān tattīrthaṃ labhate punaḥ || tathā tatraiva pādme, — śṛṇu rājan prayāge tu anāśakaphalaṃ vibho | prāpnoti puruṣo dhīmān śraddadhāno jitendriyaḥ || aśvamedhaphalaṃ tasya gacchatastu pade pade | kulāni tārayedrājan daśa-pūrvān daśāvarān