Tirthacintamani 4.p10

4.p10

purāṇaṃ puruṣaṃ vedyaṃ vyaktāvyaktaṃ sanātanam || parāparāṇāṃ sraṣṭāraṃ lokanāthaṃ jagadgurum | śrīvatsorosa' saṃyuktaṃ vanamālāvibhūṣitam || pītavastraṃ caturbāhuṃ śaṅkhacakragadādharam | hārakeyūrasaṃyuktaṃ mukuṭāṅgadadhāriṇam || sarvvalakṣaṇasaṃyuktaṃ sarvvendriyavivarjjitam | kūṭasthamacalaṃ sūkṣmaṃ jyotīrūpaṃ sanātanam || bhāvābhāvavinirmuktaṃ vyādhinaṃ prakṛteḥ param | taṃ namasye jagannāthamīśvaraṃ sukhadaṃ prabhum || ityevaṃ dharmarājastu purā nyagrodhasannidhau | stutvā nānāvidhaiḥ stotraiḥ praṇāmamakarottadā || taṃ dṛṣṭvā tu mahābhāge praṇataṃ prāñjaliṃ sthitam | stotrasya kāraṇaṃ devi pṛṣṭavānahamantakam || bhagavānuvāca — vaivasvata mahābāho sarvvadevamayo hyasi | kimarthaṃ stutavānityaṃ saṃkṣepāttadbravīhi me || yama uvāca — asminnāyatane puṇye vikhyāte puruṣottame | indranīlamayī dṛṣṭā pratimā sarvvakāmikā (kī) || tāṃ dṛṣṭvā puṇḍarīkākṣa bhāvenaikena śraddhayā