Tirthacintamani 4.p61
Tīrthacintāmaṇi 4.p61
- Language
- Sanskrit
4.p61
svavaṃśoddhārapūrvvakaviṣṇulokamahitatvakāmo akṣayavaṭadarśanamahaṃ kariṣye | iti saṅkalpya akṣayavaṭaṃ paśyet | praṇipāte'pyetadeva phalam | tataḥ— kṛṣṇapurataḥsthitasya vainateyasya samīpaṃ gatvā— oṃ adya sarvvapāpavinirmuktātmīyaviṣṇupuragamanakāmo vainateyanamaskāramahaṃ kariṣye | iti saṅkalpya—taṃ namaskuryyāt | tato viṣṇorāyatanadvāri prāṅmukha udaṅmukho vā upaviśya — oṃ adya paramagatiprāptikāmaḥ puruṣottamadarśanamahaṃ kariṣye, iti saṅkalpya puruṣottamamukhaṃ paśyet | tata evameva saṅkarṣaṇasya darśanaṃ saṅkalpya kuryyāt | evameva subhadrādarśanaṃ saṅkalpya kuryyāt | tato viṣṇorāyatanaṃ praviśya—viṣṇuṃ triḥ pradakṣiṇīkuryyāt | tataḥ—oṃ adya abhimataphalaprāpti-sarvvapāpavinirmuktātmīyaviṣṇulokagamana--tadadhikaraṇakāṅgṛtasaṃplavavyāpisukhabhoga--taduttaraihikayogibrāṣṭrapravarakulajāta--sarvvaśāstrārthapāragabrāhmaṇapravaratvabhavanataduttarajñānaprāptipūrvvakamokṣaprāptikāmaḥ saṅkarṣaṇapūjanamahaṃ kariṣye | iti saṅkalpya saṅkarṣaṇaṃ pūjayet | tatra mantraḥ— oṃ namaste halabhṛgrāma namaste muṣalāyudha | namaste revatīkānta namaste bhaktavatsala || namaste balināṃ śreṣṭha namaste dharaṇīdhara | pralambāre namaste'stu trāhi māṃ kṛṣṇapūrvvaja || tataḥ pañcopacārān kṛtvā imameva mantraṃ paṭhitvā praṇipatya prasādayet| tataḥ— oṃ adya mokṣaprāptikāmo dvādaśākṣaramantreṇa puruṣottamamahaṃ pūjayiṣye | iti saṅkalpya “oṃ namo bhagavate vāsudevāya” iti dvādaśākṣaramantreṇa gandha-puṣpa-dhūpa-dīpa-naivedyaiḥ puruṣottamaṃ pūjayet| tataḥ— oṃ jaya kṛṣṇa jagannātha jaya sarvvāghanāśana| jaya cānūrakeśighna jaya kaṃsanisūdana || jaya padmapalāśākṣa jaya cakragadādhara| jaya nīlāmbudaśyāma jaya sarvvasukhaprada || jaya deva jagatpūjya jaya saṃsāranāśana| jaya lokapate nātha jaya vāñchāphalaprada || saṃsārasāgare ghore1 niḥsāre duḥkhaphenile| krodhagrāhākule raudre viṣayodakasaṃplave || nānārogormmikalile2 mohāvarttasudustare| nimagno'haṃ suraśreṣṭha trāhi māṃ puruṣottama || iti mantraṃ paṭhitvā praṇipatya prasādayet | atha prasādhanānantaraṃ— pīnāṃsaṃ dvibhujaṃ kṛṣṇaṃ padmapatrāyatekṣaṇam| mahoraskaṃ mahābāhuṃ pītavastraṃ śubhānanam