Tirthacintamani 4.p8

4.p8

pravakṣyāmi samāsena śriyā pṛṣṭaḥ purā hariḥ || sumeroḥ kāñcane śṛṅge sarvvāścaryyasamanvite | tatra sthitaṃ jagannāthaṃ jagatsraṣṭāramavyayam || praṇamya śirasā devī lokānāṃ hitakāmyayā papracchedaṃ mahāpraśnaṃ bhūmau sthānamanuttamam || śrīruvāca— brūhi tvaṃ sarvvalokeśa saṃśayaṃ me hṛdi sthitam | martyaloke mahāścaryyaṃ karmmabhūmau sudurlabhe || lobhamohagrahāgrāhakāmakrodhamahārṇave | yena mucyanti deveśa narāḥ saṃsārasāgarāt || ācakṣva sarvvadeveśa praṇatāṃ yadi manyase | tvadṛte nāsti loke'smin vaktā saṃśayanirṇaye || brahmovāca— śrutvaivaṃ vacanaṃ tasyā devadevo janārddanaḥ | provāca parayā prītyā paraṃ sārāmṛtopamam || sukhopāyaḥ susādhyaśca nirāyāso mahāphalaḥ | āste tīrthavaro devi vikhyātaḥ puruṣottamaḥ || na tena sadṛśaḥ kaścittriṣu lokeṣu vidyate | kīrttanādyasya deveśi mucyate sarvvapātakaiḥ || na vijñāto'maraiḥ sarvvai rna daityai rna ca dānavaiḥ || marīcyādyairmunivarairgopitaṃ me varānane | dakṣiṇasyodadhestīre nyagrodho yatra tiṣṭhati || yastu kalpe samutpanne mahadulkānivarhaṇe | vināśaṃ naivamabhyeti svayaṃ tatraivamāsthitaḥ || dṛṣṭamātre caiva tasmin kāyāmākramya vā sakṛt | brahmahatyā pramucyeta pāpeṣvanyeṣu kā kathā || pradakṣiṇaṃ kṛtaṃ yaistu namaskārastu jantubhiḥ | sarvve vidhūtapāpāste gatāḥ syuḥ keśavyālayam || nyagrodhasyottare tīre dakṣiṇe' keśavasya tu | prāsādaṃ tatra tiṣṭheta padaṃ dharmmamayaṃ hi tat || pratimāṃ tatra tāṃ dṛṣṭvā svayaṃ devena nimmitām | anāyāsena vai yānti bhuvanaṃ2 me tato narāḥ || gacchamānāṃstu tān dṛṣṭvā ekadā dharmmarāṭ priye | madantikamanuprāpya praṇamya śirasā'bravīt