Tirthacintamani 9.p109

9.p109

prabhuḥ prathamakalpasya yo'nukalpena varttate | na sāmparāyikaṃ tasya durmatervidyate1 phalam || iti kātyāyanena niṣedhāt | sāmparāyikaṃ pāralaukikam | dhenudravyabhinnamatra vatsadravyaṃ dvayoḥ pṛthakdravyakathanāt | kāmadhenumahādāne tu naivam | tatra vatsadravyasya pṛthaganabhidhānāt | dhenu-vatsau ghṛtāsyau tau sitasūkṣmāmbarāvṛtau2 | śuktikarṇāvikṣupādau śucimuktāphalekṣaṇau || sitasūtraśirānaddhau sitakambalakambalau | tāmragaṇḍu(ṇḍū)kapṛṣṭhau tau sitacāmaralomakau || vidrumabhrūyugopetau navanītastanānvitau | kṣaumapucchau kāṃsyadohāvindranīlaktārakau || suvarṇaśṛṅgābharaṇau rājatakṣurasaṃyutau | nānāphalasamāyuktau ghrāṇagandhakaraṇḍakau || gandhakaraṇḍakaḥ surabhigandhāḍhyadravyaṃ karpūrādi | ityevaṃ racayitvā tu dhūpadīpairathārcayet | yā lakṣmīḥ sarvvabhūtānāṃ yā ca deveṣvavasthitā || dhenurūpeṇa sā devī mama śāntiṃ prayacchatu | dehasthā yā ca rudrāṇī śaṅkarasya sadā priyā