Tirthacintamani 9.p126

9.p126

tatra bhaviṣye,— aṣṭamūrttidharāṃ gaṅgāṃ divyarūpoṃ nirīkṣitum | sākṣāddevāśca marttyānāṃ tamupāyaṃ vrataṃ vada || śālitaṇḍulaprasthena dviprasthapayasā tathā| pāyasaṃ pācayitvā tu madhukhaṇḍaṃ ghṛtantathā || pratyekaṃ palamātrantu tatra nikṣipya bhaktitaḥ | tatpāyasamapūpāṃca modakān maṇḍalāni ca || tathā guñjārddhamātrañca suvarṇaṃ rūpyameva ca | candanāgurukarpūrakuṅkumāni ca guggulum || vilvapatrāṇi dūrvvāśca rocanāṃ sitasarṣapam | nīlotpalasya puṣpāṇi puṣpābhāve dalānyapi || yathāśaktyā mahābhaktyā gaṅgāyāṃ yo vinikṣipet | paurṇamāsyāṃ māsi māsi darśa ca praharadvaye || śraddhayā'nena mantreṇa yāvat saṃvatsarantathā | oṃ gaṅgāyai nārāyaṇyai śivāyai ca namo namaḥ || iti mantreṇa satataṃ śatamaṣṭottaraṃ japet | gaṅgājalāmtaḥsthitvā ca tanmanāstyaktasaṃśayaḥ || haviṣyāśī mitāhāro yamī teṣu dineṣu ca | saṃvatsarāmte tasyaiṣā gaṅgā divyavapurdharā || divyamālāmbaradharā divyaratnavibhūṣitā | pratyakṣarūpā puratastiṣṭhatyeva varapradā || evaṃ pratyakṣataḥ sākṣāt gaṅgāṃ divyavapurdharām | dṛṣṭvā svacakṣuṣā martyo varadānasamudyatām || yān yān kāmayate martyastāṃstān kāmānavāpnuyāt | niṣkāmastu labhenmokṣaṃ sa tenaiva ca janmanā