Tirthacintamani 9.p146

9.p146

tato gaṅgāyāṃ daśadhā savidhi snātvā-oṃ gaṅgāyai nama iti mantreṇa kṛṣṇatilānāṃ daśaprasṛtīstathā sarpiṣāṃ daśaprasṛtīstathā daśa śaktupiṇḍān tathā daśa gur̤apiṇḍāṃśca gaṅgāyāṃ kṣipet | tato gaṅgātīre'ṣṭadalamālikhya tatra vastramālyaveṣṭitagrīvaṃ jalapūrṇaṃ kumbhaṃ kṛtvā tadupari śarāvikādau haimīṃ rājatīṃ vā gaṅgāpratimāṃ caturbhujāṃ ratnakumbha-sitāmbhoja-varadābhayasratkarāṃ sunetrāṃ sarvvāvayavaśobhitāṃ śvetavastraparīdhānāṃ muktājālavibhūṣitāṃ kṛtvā tato'tisaumyāñcandrāyutasamaprabhāṃ cāmarairvījyamānāṃ śvetacchatropaśobhitāṃ suprasannāṃ karuṇārdrahṛdayāṃ sudhāplāvitabhūpṛṣṭhāṃ devādibhiḥ stutāṃ divyaratnaparīdhānāṃ divyamālyānulepanāṃ gaṅgāṃ pravāhe pratimāyāñca dhyātvā— pratyekaṃ dvātriṃśadraktikādhikatolakadvayasahitaikaviṃśatipalamitena gavyena dugdhena dadhnā ghṛtena madhunā khaṇḍitena ca pañcāmṛtaṃ kṛtvā tena tatpratimāṃ snapayitvā— oṃ namo nārāyaṇyai daśaharāyai gaṅgāyai namo namaḥ | iti paṭhitvā idaṃ pādyameṣo'rghya idamācamanīyaṃ idaṃ snānīyamityādi pratyekaṃ dadyāt | tato gandhaṃ datvā uktamantreṇa triḥ sampūjya dhūpādi datvā pratimāgrataḥ sthaṇḍile gomayenopalipya nārāyaṇaṃ maheśaṃ brahmāṇaṃ bhāskaraṃ bhagīrathaṃ himavantañca pañcopacāraiḥ sampūjya daśabhyo viprebhyo daśatilaprasthān dadyāt