Tirthacintamani 9.p17

9.p17

atha gaṅgātoyapānaphalam | tatra bhaviṣyapurāṇe— kanyādānaistathā'nyatra bhūmidānaiśca bhaktitaḥ | annadānaiśca godānaiḥ svarṇadānādibhistathā || rathā'śva-gajadānaiśca yatpuṇyaṃ parikīrttitam | tataḥ śataguṇaṃ puṇyaṃ gaṅgāgaṇḍūṣato bhavet || cāndrāyaṇasahastrāṇāṃ yat phalaṃ parikīrttitam | tato'dhikaphalaṃ gaṅgātoyapānādavāpyate || skandapurāṇe— gaṇḍūṣamātrapānena aśvamedhaphalaṃ labhet | svacchandaṃ yaḥ pivedabhaktastasya muktiḥ kare sthitā || tathā— tribhiḥ sārasvataṃ toyaṃ saptabhistvatha yāmunam | nārmmadaṃ daśabhirmāsairgāṅgaṃ varṣeṇa jīryyati | 1nābhyantargatatoyānāṃ mṛtānāṃ kvāpi dehinām | tattattīrthaphalāvāptirnā'tra kāryyā vicāraṇā || tathā— cāndrāyaṇasahasrantu yaścaret kāyaśodhanam | yaḥ pivet tad yatheṣṭantu gaṅgāmbhaḥ sa viśiṣyate || bhaviṣye— gaṅgāṃ paśyati saṃstauti snāti bhaktyā pivejjalam | sa svargaṃ jñānamamalaṃ yogaṃ mokṣañca vindati