Tirthacintamani 9.p45

9.p45

oṃ aihikajīvanmuktatva-dehāntakālikamuktatvakāmo adyādi yāvajjīvaṃ gaṅgāyāṃ snānamahaṃ kariṣye | atha kālaviśeṣe snānam| tatra brahmāṇḍapurāṇe— nairuntaryeṇa gaṅgāyāṃ māghe1 yaḥ snāti mānavaḥ| sa śakralokeṣu ciraṃ kālaṃ sthitvā sagotrajaḥ| tato brahmapure tiṣṭhet kalpakoṭiśatāyutam || atra ca sauramāsaparigrahaḥ śiṣṭācārāt| bhaviṣye— nairantaryeṇa vidhinā gaṅgāyāṃ snāti yo naraḥ| ṣaṇmāsamekastvaparaḥ sakṛdevottarāyaṇe || tayoḥ samaṃ bhavet puṇyaṃ viṣuveṣu tathaiva ca| saṃkrāntiṣu ca sarvvāsu cāturmāsyaphalaṃ labhet || etadeva bhavet puṇyaṃ māgha-kārttikamāsayoḥ| saṃvatsaraphalantu syāt navamyāṃ kārttike tathā || iyañca śuklā prāthamyāt| manvādau ca yugādau ca māsatrayaphalaṃ labhet| dvādaśyāṃ śravaṇarkṣe ca aṣṭamīṃ puṣyayogataḥ|| ārdrāyāñca caturddaśyāṃ gaṅgāsnānaṃ sudurlabham| vaiśākhe vai paurṇamāsyāṃ māghe vai kārttike tathā || tathā māghī tvamāvāsyā gaṅgāyāmatidurlabhā| kṛṣṇāṣṭamyāṃ sahasrantu śataṃ syāt sarvvaparvvasu| aṣṭamī ceyaṃ māghasya tatsandarbhāt