Tirthaprakasha 1.p4

1.p4

tīrthasvarūpaṃ tīrthānāṃ puruṣārthanimittatā | tīrthakīrttanamāhātmyaṃ vibhāgāścāpi tīrthagāḥ || 1 || tīrthayātrādhikāraśca yātrāṅgā'nuṣṭhitistathā | yātrāyānakathā'gamyagamyadeśādikīrttanam || 2 || kālaśuddhiśca yātrāyāṃ dūrādyātrāphalaṃ tathā | tīrthaprāptidine kṛtyaṃ tīrthaprāptāvupoṣaṇam || 3 || muṇḍanaṃ ca tathā tīrthasnānaṃ tīrthe ca tarpaṇam | tīrthaśrāddhaṃ ca tīrtheṣu devatādarśanādikam || 4 || pratigrahaniṣedhādistīrthe'nuṣṭhānapaddhatiḥ | jambūdvīpasya varṣāṇāmadrīṇāṃ cāpi kīrttanam || 5 || uddeśaḥ sarvatīrthānāṃ nadīnāṃ cāpi tatphalam | sāmānyataḥ samuddiṣṭamatha kāśīvivecanam || 6 || tataḥ prayāgamahimā gaṅgāyāḥ sāgarasya ca | saṅgamādikamapyatra varṇyate jāhnavī tataḥ || 7 || kīrttyate yamunā cāpi narmmadā tadanantaram | tato gayāvidhiḥ samyak mandāramahimā tataḥ || 8 || atha kokāmukhavidhiḥ kurukṣetraphalaṃ tataḥ | pṛthūdakādimāhātmyaṃ sarasvatyāḥ phalaṃ tataḥ || 9 || atha prabhāsamāhātmyaṃ mahimā puṣkarasya ca | stutasvāmistutikathā badarīvarṇanaṃ tataḥ || 10 || lohārgalasya māhātmyaṃ kedāramahimā mahān | śālagrāmaguṇagrāmo naimiṣonmeṣaṇaṃ tataḥ || 11 || indraprasthasya māhātmyamayodhyā mahimodayaḥ | mathurāmahimaślāghā citrakūṭānukīrttanam || 12 || kālañjarasya mahimā śṛṅgaverapuraṃ tataḥ | avantī dvārakā tāpī tāpīsāgarasaṅgamaḥ || 13 || payoṣṇīsnānamahimā mahī godāvarī tataḥ | sahyāmalakamāhātmyaṃ gokarṇamahimā mahān || 14 || saptakoṭeśvarakathā setubandhaphalaśrutiḥ | puruṣottamamāhātmyamekāgraguṇagumphanam || 15