Tirthaprakasha 1.p45

1.p45

na grahāstodyakṛto doṣo viśveśvaraRemoverlaye | iti | evaṃ luptasamvatsare'pi tīrthayātrā na kāryā | pūrvarāśiṃ yadā tyaktvā apūrṇe vatsare guruḥ | aparaṃ rāśimāyāti luptakālaḥ sa ucyate || aticāragato jīvaḥ pūrvabhaṃ naiva gacchati | nācarettatra karmāṇi tadā tatraiva saṃsthite || luptakālaḥ, samvatsaro luptaḥ karmānarha ityarthaḥ | tathā, aticāragato jīvastaṃ rāśiṃ naiti cetpunaḥ | luptasamvatsaro jñeyaḥ sarvakarmasu garhitaḥ || asyāpavādastu— aticāragate jīve vṛṣavṛścikakumbhayoḥ | yajñodvāhādikaṃ kuryāt tatra kālo na lupyate || tathā, meṣe vṛṣe jhaṣe kumbhe yadyatīcārago guruḥ | na tatra kālalopaḥ syādityāha bhagavān yamaḥ || tathā, meṣe vṛṣe........ityāha bhālrvo muniḥ | tīrthaviśeṣe gurumauḍhyādidoṣo nāsti | godāvaryāṃ gayāyāṃ ca śrīśaile grahaṇadvaye | surāsuragurūṇāṃ ca mauḍhyadoṣo na vidyate || vāyupurāṇe, gayāyāṃ sarvakāleṣu piṇḍaṃ dadyādvidhānataḥ | adhimāse janmadine aste ca guruśukrayoḥ || ādhimāsādau gayāyātrā niṣiddhaiva | etadvalāt sāpi na niṣiddhyetyanye | anye tu— gārgātrimāṇḍavyaparāśarādyāḥ bhṛgvaṅgiraḥkaśyapaśaunakādyāḥ | luptābdadoṣaṃ pravadanti madhye somodbhavāyāḥ suranimnagāyāḥ|| luptavatsaradoṣastu payoṣṇīnimnagātaṭāt | nānyadeśeṣviti prāhurvasiṣṭhātriparāśarāḥ || iti paṭhanti | evaṃ mahāgurunipāte tīrthayātrādikaṃ na kāryyam | yathā ratnākare— devalaḥ, anyaśrāddhaṃ parānnaṃ ca gandhamālyādi maithunam | varjayedgurupāte tu yāvatpūrṇo na vatsaraḥ || tathā, mahāgurunipāte tu kāmyaṃ kiñcinna cācaret | ārtvijyaṃ brahmacaryyaṃ ca śrāddhaṃ devakriyāṃ tathā || 'śrāddhaṃ devayutaṃ ca yat' iti kālikāpurāṇe pāṭhaḥ | devīpurāṇe, pramītau pitarau yasya dehastasyāśucirbhavet | nāpi daivaṃ na vā pitryaṃ yāvat pūrṇo na vatsaraḥ || iti | dākṣiṇātyāstu— tīrthasnānaṃ mahādānaṃ parānnaṃ tilatarpaṇam | abdamekaṃ na kurvīta mahāgurunipātane || vapanaṃ maithunaṃ tīrthaṃ varjayedgurviṇīpatiḥ | śrāddhaṃ ca saptamānmāsāddhvaṃ cānyatra vedavit || śrāddhaṃ śrāddhabhojanamiti vyācakṣate | asthikṣepārthatīrthayāṃtrāyāmādyavarṣe'pi na doṣa ityāhuḥ | yātrātithinakṣatrādivicāro jyotiṣaprakāśe samayaprakāśe ca jñātavyaḥ | athedānīṃ dūrāgatānāṃ gaṅgādisnānādau viśeṣaḥ smṛtyarthasārokto likhyate | tatra prāyaścittavidhinā saṅkalpapūrvakaṃ padbhyāṃ ṣaṣṭiyojanāgatasya gaṅgāsnāne ṣaḍabdakṛcchrasamaṃ phalam | evaṃ ca daśayojanāgatasyābdatulyam | evamīpadadhikatṛtīyāṃśādhikakrośāgatasya gaṅgāyāṃ snāne kṛcchratulyaṃ phalam | ṣaṣṭiyojanāpekṣayā yojanavṛddhau arddhakṛcchravṛdvirboddhyā | pūrvaṃ saptamātṛkā rakṣobhayānnadyo jātā bhaye gate punardevatā abhūvan tato nadyaḥ śuṣkāḥ teṣu sthaleṣu bhāgīrathī samabhūt | tāsu viṣṇugaṅgādisaptamātṛkā nāma sapta gaṅgāḥ|tāsu ṣaṣṭiyojanāgatasya snānaṃ ṣaḍabdakṛcchrasamam | prayāge vārāṇasyāṃ gaṅgādvāre gaṅgāsāgarasaṅgame ca dviguṇaṃ, yamunāyāṃ viṃśatiyojanāgatasya snānaṃ tryabdasamaṃ, mathurāyāṃ dviguṇaṃ, sarasvatyāṃ catvāriṃśadyojanāgatasya caturabdasamaṃ, prabhāse dvāravatyāṃ ca dviguṇaṃ, yamunāsarasvatyoryātrāyojanavṛddhau pādakṛcchravṛddhiḥ parikalpyā ityādikam