Tirthaprakasha 1.p46

1.p46

tatra yānādinā gato'pi tīrthasamīpe yathāśakti kiyaddūraṃ kevalapadbhyāmeva gatvā tīrthe dṛṣṭipathaṃ gate sāṣṭāṅgaṃ praṇamet | tīrthāya nama iti puṣpāñjaliṃ dadyāt | yathāśaktyupakaṭhau karpaṭaṃ sthāpayet | tathaiva śiṣṭācārāt | paṭhanti cayānāni ca parityajya bhāvyaṃ pādacarairnaraiḥ | luṇṭhitvā loṭhinīṃ tatra kṛtvā kārpaṭikākṛtim || loṭhinīṃ luṇṭhitvā, sāṣṭāṅgaṃ natvā | yadi yātrāsamaye kārpaṭikākṛtirna kṛtā tadedānīmapi kāryetyarthaḥ | tataḥ prathamaṃ praṇavena tīrthaṃ spṛṣṭvā tataḥ sacailamavagāheta ācārāt | paṭhanti caprathamaṃ cālabhettīrthaṃ praṇavena jalaṃ śuci | avagāhya tataḥ snāyādyathāvanmantrayogataḥ || iti | avagāhya, sacailaṃ snātvā | mantraśca— prabhāsakhaṇḍe, oṃnamo devadevāya śitikaṇṭhāya daṇḍine | rudrāya cāpahastāya cakriṇe vedhase namaḥ || sarasvatī ca sāvitrī vedamātā garīyasī | sannidhānībhavatvatra tīrthe pāpapraṇāśini || sarveṣāmeva tīrthānāṃ mantra eṣa udāhṛtaḥ