Tirthaprakasha 3.p6.1

3.p6.1

iti mantreṇa granthibandhanaṃ snapanaṃ ca kāryam | gāruḍe, mātaraṃ pitaraṃ cāpi bhrātaraṃ suhṛdaṃ gurum | yamuddiśya nimajjeta dvādaśāṃśaṃ labheta saḥ || tena snānadvādaśāṃśaphalam | mātrādīnuddiśya svayaṃ snāyādityarthaḥ | atra snānaṃ mṛdgrahaṇaṃ vinā majjanamātramiti kecit | yadyapīdaṃ māghādhikāre paṭhitaṃ tathāpyekatra darśanādācārāccānyatrāpyanveti | mātaraṃ pitaraṃ jāyāmiti kvacitpāṭhaḥ| daśamāṃśaṃ labheta sa iti smṛtidarpaṇe pāṭhaḥ| idaṃ ca parārthasnānaṃ jīvantamuddiśyaiva | mṛtamuddiśya tarpaṇādereva vidhānāt | mṛtamuddiśyāpi tadityanye | mahābhārate, kurukṣetraṃ gayāṃ gaṅgāṃ prabhāsaṃ puṣkarāṇi ca | etāni manasā dhyātvā'vagāheta tato jalam | sa vimucyeta pāpena rāhuṇā candramā yathā || kurukṣetrādismaraṇe pāpakṣayaḥ phalam | pāpakṣayaśravaṇamarthavādo vā | ktvāpratyayena smaraṇasya snānāṅgatvāvagamāt | etacca smaraṇaṃ majjanapūrvāṅgāntaraṃ majjanāvyavahitaprākkāle karttavyam | aṅgaprāptiśca tīrthasnānasyasaraḥsu devakhāteṣu tīrtheṣu ca nadīṣu ca | kriyāsnānaṃ samuddiṣṭaṃ snānaṃ tatra matā kriyā || iti śaṅkhena kriyāsnānatvena paribhāṣitasya “kriyāsnānaṃ pravakṣyāmi” ityādiśaṅkhavacanenaiva | ataśca kriyāsnānadharmā eva tīrthasnāne na tu nityasnānadharmāḥ | te cāhnikaprakāśe draṣṭavyāḥ | tīrthasnānaṃ tu prakaraṇabhedāt nityasnānādyapekṣayā pṛthageva kāmyaṃ nityaṃ ca | sarvatīrthe ca prātisvikaphalasattve'pi vaikalpikaṃ sarvasādhāraṇaṃ phalaṃ pāpakṣayaḥ | sarvāṇyeva tu tīrthāni pāpaghnāni sadā nṛṇām | iti śaṅkhavacanāt | atha tarpaṇam |