Tirthaprakasha 3.p5

3.p5

ityanena virodhāpatteḥ | na ca tasyākāsmikatīrthaprāptinimittaketaraparatā | uktarītyā'saṅkocenaivopapattau saṅkoce mānābhāvāt | madanapārijāte'pyevam | vastutastu ubhayorapi tīrthasnānavidhiniṣedhayostīrthādhikaraṇakasnānāntaraparatvāttīrthanimittasnānasya nimittavaśāt karaṇameva | nimittabhūtā prāptireva paraṃ malamāse na kāryā yātrāyā niṣiddhatvāt | ato daivāttīrthe prāptasya tatprāptinimittakaṃ snānādi bhavatyeva | evamvivāhatīrthayajñeṣu yātrāyāṃ tīrthakarmaṇi | na tatra sūtakaṃ tadvat karma yajñādi kārayet || iti paiṭhīnasivacanamapyārabdhatīrthādhikaraṇakasnānādiparaṃ yajñasāhacaryyāt | na hi sūtake yāga ārabhyate kiṃ tvārabdhaḥ samāpyate | akasmāttīrthaprāptau tu āśauce'pi naimittikaṃ snānaṃ kāryameva nimittabalāt | tīrthe cānyamuddiśya kuśapratikṛtisnapanaṃ kāryam | tatra prāptidinaniyamo nāsti mānābhāvāt | snāpayet snigdhamitrādīn jñātīṃstīrthe narottamaḥ | anyathā praharantyete balāttīrthabhavaṃ phalam || iti skāndavacanāt | tathā, pratikṛtiṃ kuśamayīṃ tīrthavāriṇi majjayet | majjayettu yamuddiśya so'ṣṭabhāgaṃ phalaṃ labhet || pratikṛtiḥ pratimā | kuśamayī pratikṛtiḥ granthiyutakuśarūpabaṭurvā | atra cācārātkuśo'si kuśaputro'si brahmaṇā nirmitaḥ purā | tvayi snāte tu sa snāto yasyārthe granthibandhanam