Tirthaprakasha 4.p129

4.p129

kimatra bahunoktena yaddānaṃ kriyate naraiḥ | dharmakarmārthamuddiśya tadanantaphalaṃ smṛtam || tathā, avimukte mahādevamarcayanti stuvanti vai | sarvapāpavimuktāste santiṣṭhantyajarāmarāḥ || avimuktaṃ samāsādya liṅgamarcayate naraḥ | kalpakoṭiśatairrvāpi tasya nāsti punarbhavaḥ || ajaro hyakṣayaścaiva krīḍetsa bhavasannidhau | ye tu dhyānaṃ samāsādya yuktātmānaḥ samāhitāḥ || sanniyamyendriyagrāmaṃ japanti śatarudriyam | avimukte sthitā nityaṃ kṛtārthāste dvijottamāḥ || tathā, ekāhamupavāsaṃ yaḥ kariṣyati yaśasvini ! | phalaṃ varṣaśatasyeha labhate matparāyaṇaḥ || varṣaśatasyopoṣitasyetyarthaḥ | mātsye, rājapratigrahāsaktān bhṛtakān pūjayanti ye | te rudraśāpanirdagdhāḥ patanti narake dhruvam || ye punaḥ siddhaliṅgānāṃ prāsādānāṃ ca bhaktitaḥ | kurvanti pūjāṃ satkāraṃ te muktā nātra saṃśayaḥ || siddhaliṅgānāṃ pūjāṃ prāsādānāṃ ca satkāramityanvayaḥ | tathā, khaṇḍasphuṭitasaṃskāraṃ tatra kurvanti ye narāḥ | te rudralokamāsādya modante sukhinaḥ sadā || kāśīkhaṇḍe, avimuktaṃ samāsādya yo liṅgaṃ sthāpayet sudhīḥ | kalpakoṭiśatairrvāpi nāsti tasya punarbhavaḥ || tathā, samāgatyeha kāśyāṃ yaḥ kuryādekaṃ śivālayam | tena trailokyamakhilaṃ sālayaṃ kṛtameva hi || tapāṃsi tena taptāni śīrṇaparṇāśanānyapi | vārāṇasīṃ samāsādya yenākāri śivālayaḥ || brahmavaivartte, kāśyāṃ rudramayāḥ sarve jantavaḥ śrutinoditāḥ | te pibanti jalaṃ yatra taḍāgādau tṛṣārdditāḥ || tatpuṇyaṃ na mayā vaktuṃ śakyaṃ varṣaśatairapi | parantu sāvadhānaiḥ sa kartavyo hi jalāśayaḥ || aparādho na bhavati mahāpāpakṛdakṣayaḥ | pārvatyuvāca | jalāśaye kṛte deva ! kārite vā mahātmabhiḥ | ko'parādhaḥ patedatra tanmamācakṣva śaṅkara ! || mahādeva uvāca | kāśyāṃ tile tile liṅgaṃ kāśyāṃ tīrthaṃ pade pade | khananaṃ kāśibhūmestu durghaṭaṃ tena pārvati ! || jīrṇoddhāraṃ ca ye kuryurniḥsandehā bhavanti te | na tatra liṅgapīḍā syānna tatra khananaṃ bhavet || pādme, dvijaṃ svadharmanirataṃ yo varṣāśanadānataḥ | sthāpayet śraddhayā yuktastasya puṇyaphalaṃ śṛṇu || yāvatyaḥ sikatāḥ santi gaṅgāyāṃ munisattama ! | tāvadvarṣasahasrāṇi krīḍedindreṇa saṅgataḥ || paścādatra mahārājo jāyate nirmale kule | dīrghāyurbahuputraśca sukhī śaṅkarabhaktimān || ante ca labhate kāśīṃ tato nirvāṇamāpnuyāt | aśvatthaṃ picumandaṃ vā sahakāramatho latām || yo ropayati yatnena tasyāpyetat phalaṃ bhavet | brahmavaivarte, yaḥ kāśyāṃ vāsayedekaṃ sthāvaraṃ vāpi jaṅgamam | yāvatkālaṃ sa vasati tāvallakṣaṇaguṇādhikam || śivaloke vasetkālamiti śāstraviniścayaḥ | yaṃ kañcidapi vā kāśyāmekāhamapi vāsayet || varṣakoṭiśataṃ brahman ! rudraloke mahīyate | janmāntare punaḥ kāśyāṃ śivajñānamavāpsyati || trayo dharmāḥ sarvadharmādadhikāstvakṣayāḥ sadā | piśācamocane tīrthe loṣṭadroṇaṃ samuddharet || na pīḍyate pare loke svalpayāpi pipāsayā