Tirthaprakasha 4.p135

4.p135

phālgunasya caturdaśyāṃ kṛṣṇapakṣe samāhitāḥ || puṣpaiḥ phalaistathānyaiśca bhakṣyairuccāvacaistathā | kṣīreṇa madhunā caiva toyena saha sarpiṣā || tarpayanti paraṃ liṅgamarcayanti śivaṃ śubham | huḍuṅkāranamaskārairnṛtyagītaistathaiva ca || mukhavādyairanekam̐śca stotramantraistathaiva ca | upoṣya rajanīmekāṃ bhaktyā paramayā mudā || te yānti paramaṃ sthānaṃ sadāśivamanāmayam | bhūte'hni caitramāsasya pūjayetparameśvaram || sa vittaśapuraṃ prāpya krīḍate yakṣarāḍiva | vaiśākhasya caturdaśyāṃ yo'rcayet prayataḥ śivam || viśākhalokamāsādya tasyaivānucaro bhavet | jyeṣṭhamāsacaturdaśyāṃ yo'rcayecchraddhayā haram || svargaloke sumukhi sa krīḍate yāvadīpsitam | śrāvaṇasya caturdaśyāṃ kāmaliṅgasamanvitam || dadāti vāruṇaṃ lokaṃ krīḍate cāpsaraiḥ saha | māsi bhādrapade yuktamarcayitvā tu śaṅkaram || puṣpaiḥ phalaiśca vividhairindrasyaiti salokatām | pitṛpakṣe caturdaśyāṃ pūjayitvā tatheśvaram || samprāpya pitṛlokaṃ tu krīḍate pūjitastu taiḥ | prabodhamāse deveśamarcayitvā maheśvaram || sa candralokamāsādya krīḍate yāvadīpsitam | prabodhamāse, kārttikamāse | bahule mārgaśīrṣasya pūjayitvā pinākinam | viṣṇulokamavāpnoti krīḍate kālamakṣayam || arccayitvā tathā pauṣe sthāṇuṃ hṛṣṭena cetasā | prāpnoti nairṛtaṃ sthānaṃ tenaiva saha modate || māghe samarccāyitvā vai puṣpamūlaphalaiḥ śubhaiḥ | prāpnoti śivalokaṃ tu tyaktvā saṃsārasāgaram || kṛttivāseśvaraṃ devamarccayettaṃ prayatnataḥ | avimukte ca vastavyaṃ yadīcchenmāmakaṃ padam || gāyanti siddhāḥ kila gītakāni dhanyāvimukte tu narā vasanti svargāpavargasya padasya liṅgaṃ ye kṛttivāsaṃ śaraṇaṃ prapannāḥ