Tirthaprakasha 4.p194

4.p194

kambalāśvatarau nāgau yamunādakṣiṇe taṭe | iti kalpatarulikhitamatsyapurāṇāditi | yāmune cottaraṃ kūle prayāgasya tu dakṣiṇe | ṛṇapramocanaṃ nāma tīrthaṃ tatparamaṃ smṛtam || iti vacanādyamunottarakūlaparyyantaṃ prayāgadakṣiṇasīmeti | prayāgastu brahmayūpopalakṣitapradeśa iti vadatāṃ prāmāṇikānāmapīdṛśakṣetra eva tātparyyam | prayāgamaṇḍalaṃ tu pañcayojanaparimitam | pañcayojanavistīrṇaṃ prayāgasya tu maṇḍalam | itimātsyān | evaṃ ca brahmayūpamavadhīkṛtya sārddhayojanadvayamite sūtre caturdikṣu bhrāmite varttulaṃ prayāgamaṇḍalaṃ jñeyam| prayāgavyāptyā viṃśatidhanuḥpramāṇā veṇī | māghaḥ sitāsite vipra ! rājasūyaiḥ samo bhavet | dhanurviṃśativistīrṇasitanīlāmbusaṅgame || iti pādmāt | idaṃ kṣetratīra eva avadhyantarākathanāt | evaṃ ca veṇīvyāpakaṃ prayāgaṃ tadvyāpakaṃ prayāgamaṇḍalaṃ tanmate | kalpatarukāraistu etadvākyasyālikhanāt sitāsitasaṅgamamātraṃ veṇīti tanmate gamyate