Tirthaprakasha 4.p195

4.p195

mātsye, deśastho yadi vā'raṇye videśe yadi vā gṛhe | prayāgaṃ smaramāṇo'pi yastu prāṇān parityajet || brahmalokamavāpnoti vadanti ṛṣipuṅgavāḥ | skānde, bahu vālpataraṃ vāpi pāpaṃ yasya narādhipa ! | prayāgaṃ smaramāṇasya sarvamāyāti saṅkṣayam || iti | atha prayāgagamanamahimā | kaurme, prayāgagamanaṃ śreṣṭhaṃ narāṇāṃ pāpakarmaṇām | tatra devo mahādevo rudro viśvāmareśvaraḥ || sahāste bhagavān brahmā svayambhūrapi daivataiḥ | tathā, pañcayojanavistīrṇaṃ prayāgasya tu maṇḍalam | praveśāttasya tadbhūmāvaśvamedhaḥ pade pade || iti | atha prayāgadarśananāmakīrttanamṛttikālambhanānāṃ phalam | mātsye, darśanāttasya tīrthasya nāmasaṅkīrttanādapi | mṛttikālambhanādvāpi naraḥ pāpātpramucyate || iti | atha prayāgavāsaphalam | tatraiva, prayāgamanugacchedvā vasate vāpi yo naraḥ | sarvapāpaviśuddhātmā rudralokaṃ sa gacchati || iti | atha māsavāsaphalam | tatraiva, tato gatvā prayāgaṃ tu sarvadevābhirakṣitam | brahmacārī vasenmāsaṃ pitṝn devāṃśca tarpayet || īpsitān labhate kāmān yatra yatrābhijāyate | iti | ayaṃ tu māsaḥ sāvanaḥ kaścideva grāhyaḥ | skānde, brahmahatyādipāpānāṃ prāyaścittacikīrṣuṇā | sevyaṃ sitāsitaṃ tīrthaṃ prakṛṣṭaṃ jagatītale || iti | idamātyantikavāsaparamiti vadanti