Tirthaprakasha 4.p199

4.p199

brahmacārī jitakrodhastrirātraṃ yadi tiṣṭhati | sarvapāpaviśuddhātmā so'śvamedhaphalaṃ labhet || uttare tu pratiṣṭhānāt bhāgīrathyāstu pūrvataḥ | haṃsaprapatanaṃ nāma tīrtha trailokyaviśrutam || aśvamedhaphalaṃ tasmin snānamātreṇa bhārata ! | yāvaccandraśca sūryyaśca tāvat svarge mahīyate || urvvaśīpuline ramye vipule haṃsapāṇḍare | parityajyati yaḥ prāṇān śṛṇu tasyāpi yatphalam || ṣaṣṭivarṣasahastrāṇi ṣaṣṭivarṣaśatāni ca | sevyate pitṛbhiḥ sārddhaṃ svargaloke narādhipa || urvvaśīṃ ca sadā paśyeddevaloke narottama ! | pūjyate satataṃ devairṛṣigandharvvakinnaraiḥ || tataḥ svargātparibhraṣṭaḥ kṣīṇakarmā divaścyutaḥ | urvvaśīsadṛśīnāṃ tu kanyānāṃ labhate śatam || madhye nārīsahastrāṇāṃ bahūnāṃ ca patirbhavet | daśagrāmasahastrāṇāṃ bhoktā bhavati pārthiva ! || kāñcīnūpuraśabdena supto'sau pratibuddhayate | bhuktvā ca vipulān bhogān tattīrthaṃ labhate punaḥ || śuklāmbaradharo nityaṃ niyataḥ saṃyatendriyaḥ | ekakālaṃ tu bhuñjāno māsaṃ bhūmipatirbhavet || suvarṇālaṅkṛtānāṃ tu nārīṇāṃ labhate śatam | pṛthivyāmāsamudrāyāṃ mahābhūmipatirbhavet || dhanadhānyasamāyukto dātā bhavati nityaśaḥ | sa bhuktvā vipulān bhogāṃstattīrthaṃ smarate punaḥ|| atha sandhyāvaṭe ramye brahmacārī jitendriyaḥ | upāsīta śuciḥ sandhyāṃ brahmalokamavāpnuyāt || koṭitīrthaṃ samāsādya yastu prāṇān parityajyet | koṭivarṣasahasrāṇi svargaloka mahīyate || tataḥ svargātparibhraṣṭaḥ kṣīṇakarmā divaścyutaḥ | suvarṇamaṇimuktāḍhye kule jāyeta rūpavān || tato bhogavatīṃ gatvā vāsukeruttareṇa tu | daśāśvamedhikaṃ nāma tīrthaṃ tatrāparaṃ bhavet || kṛtābhiṣekastu naraḥ so'śvamedhaphalaṃ labhet | dhanāḍhyo rūpavān dakṣo dātā bhavati dhārmikaḥ || caturvediṣu yatpuṇyaṃ satyavādiṣu yatphalam | ahiṃsāyāṃ tu yo dharmo gamanādeva tatphalam || tathā, mānasaṃ nāma tīrthaṃ tu gaṅgāyā uttare taṭe | trirātropoṣitaḥ snātvā sarvān kāmānavāpnuyāt || gobhūhiraṇyadānena yatphalaṃ prāpnuyānnaraḥ | tatphalaṃ samavāpnoti tattīrthaṃ smarate punaḥ || akāmo vā sakāmo vā gaṅgāyāṃ yo vipadyate | mṛtastu labhate svargaṃ narakaṃ ca na paśyati || apsarogaṇasaṅgītaiḥ supto'sau pratibuddhyate | haṃsasārasayuktena vimānena sa gacchati || bahuvarṣasahasrāṇi svargaṃ rājendra ! bhuñjati | tataḥ svargātparibhraṣṭaḥ kṣīṇakarmā divaścyutaḥ || suvarṇamaṇimuktāḍhye jāyate vipule kule | tathā, yāmune cottare kūle prayāgasya tu dakṣiṇe | ṛṇapramocanaṃ nāma tīrthaṃ tu paramaṃ smṛtam || ekarātroṣitaḥ snātvā ṛṇaiḥ sarvaiḥ pramucyate | svargalokamavāpnoti anṛṇaśca sadā bhavet || iti | atha prayāge kāmyakarmāṇi | mātsye, tatra dānaṃ pradātavyaṃ yathāvibhavavistaram | tena tīrthaphalaṃ caiva varddhate nātra saṃśayaḥ || svarge tiṣṭhati rājendra ! yāvadābhūtasamplavam | tathā, gaṅgāyamunayormadhye yastu gāṃ sampratīcchati | suvarṇamaṇimuktā vā yadi vānyapratigraham || svakārye pitṛkārye vā devatābhyarcane'pi vā | viphalaṃ tasya tattīrthaṃ yāvattaddhanamaśnute || tathā, tīrthe na pratigṛhṇīyāt puṇyeṣvāyataneṣu ca | nimitteṣu ca sarveṣu hyapramatto bhavedvijaḥ || kapilāṃ pāṭalāṃ varṇādyastatraiva prayacchati | svarṇaśṛṅgīṃ raupyakhurāṃ celakaṇṭhīṃ payasvinīm || prayāge śrotriyaṃ sādhuṃ grāhayitvā yathāvidhi | śuklāmbaradharaṃ śāntaṃ dharmajñaṃ vedapāragam || sā gaustasyaiva dātavyā gaṅgāyamunasaṅgame | vāsāṃsi ca mahārhāṇi ratnāni vividhāni ca || yāvadromāṇi tasyā goḥ santi gātreṣu sattama ! | tāvadvarṣasahasrāṇi svargaloke mahīyate || yatrā'sau labhate janma sā gaustatrābhijāyate | na ca paśyati taṃ ghoraṃ narakaṃ tena karmaṇā || uttarān sa kurūn prāpya modate kālamakṣayam | gavāṃ śatasahasrebhyo dadyādekāṃ payasvinīm || putrāndārāṃstathā bhṛtyān gaurekā pratitārayet | tasmātsarveṣu dāneṣu godānaṃ tu viśiṣyate || durgame viṣame ghore mahāpātakasambhrame | gaureva rakṣāṃ kurute tasmāddeyā dvijottame || tathā, gaṅgāyamunayormadhye yastu kanyāṃ prayacchati | ārṣeṇaiva vidhānena yathāvibhavavistaram || na sa paśyati taṃ ghoraṃ narakaṃ tena karmaṇā | uttarān sa kurūn gatvā modate kālamakṣayam || putradārāṃśca labhate dhārmikān rūpasaṃyutān