Tirthaprakasha 4.p207

4.p207

snātvā tu sāgare martyaḥ pavitraṃ kāpilaṃ harim | paśyeddevīṃ ca vārāhīṃ sa yāti tridaśālayam || iti | brāhme, yo yamarthayate kāmaṃ puruṣaḥ kāmamohitaḥ | maraṇāllabhate sarvaṃ gaṅgāsāgarasaṅgame || adyāmukaprāptikāmo gaṅgāsāgarasaṅgame maraṇamahaṃ kariṣye iti prayogaḥ | skānde śivavākyam | muktikṣetreṣu sarveṣu kāmyamṛtyurvidhīyate | sarvatra labhate kāmaṃ maraṇānnāsti saṃśayaḥ || iti | atha gaṅgāsarayūsaṅgamamāhātmyam | gaṅgāvākyāvalyām, veṇīvāhaṃ tatastīrthaṃ sarayūryatra gaṅgayā | supuṇyayā mahāpuṇyā svasā svasreva saṅgatā || harerdakṣiṇapādābjakṣālanāttvamarāpagā | vāmapādodgavāṃ viddhi sarayūṃ mānasodgavām || tīrthe tatrārcayan rudraṃ viṣṇurviṣṇutvamāptavān | pañcāśvamedhaphaladaṃ snānaṃ tasminnaghāpaham || iti | veṇīvāhaṃ dardarītiprasiddham | adya pañcāśvamedhayajñajanyaphalasamaphalaprāptikāmo gaṅgāsarayūsaṅgame snānamahaṃ kariṣye iti prayogaḥ | atha gaṅgāgaṇḍakīsaṅgamamāhātmyam | gaṅgāvākyāvalyām, tatastu gaṇḍakītīrthaṃ gaṇḍakī yatra saṅgatā | gosahasrasya dānaṃ ca tatra snānena saṃmitam || adya gosahasrapradānajanyaphalasamaphalaprāptikāmo gaṅgāgaṇḍakīsaṅgame snānamahaṃ kariṣye iti | atha gaṅgākauśikīsaṅgamamāhātmyam | gaṅgāvākyāvalyām, viśvāmitrasya bhaginī gaṅgayā yatra saṅgatā | tatrāplutya ca vittādiḥ samantaḥ syāt priyātithiḥ || adya vittādisamantapriyātithitvakāmo gaṅgākauśikīsaṅgame snānamahaṃ kariṣye iti | atha gaṅgāsarasvatīsaṅgamamāhātmyam | mahābhārate pulastyatīrthayātrāyām, gaṅgāyāśca naraśreṣṭha ! sarasvatyāśca saṅgame | snāto'śvamedhaṃ prāpnoti svargalokaṃ ca gacchati || iti | atha gaṅgāgomatīsaṅgamaphalam | bhārate, gomatīgaṅgayoścaiva saṅgame lokaviśrute | agniṣṭomamavāpnoti kulaṃ cāpi samuddharet || iti