Tirthaprakasha 4.p211

4.p211

pravāhamavadhiṃ kṛtvā yāvaddhastacatuṣṭayam | tatra nārāyaṇaḥ svāmī nānyaḥ svāmī kadācana ||. atra na pratigṛhṇīyātprāṇaiḥ kaṇṭhagatairapi | brahmāṇḍe'pi ‘kadācana’ityantamabhidhāya— atra dattaṃ hutaṃ japtaṃ koṭikoṭiguṇaṃ bhavet | ityuktam | dānadharme, bhādrakṛṣṇacaturdaśyāṃ yāvadākramate jalam |. tāvadgarbhaṃ vijānīyāttadanyattīramucyate || gaṅgāvākyāvalyāṃ brahmāṇḍe, sārddhahastaśataṃ yāvadgarbhatastīramucyate | atra na pratigṛhṇīyān prāṇaiḥ kaṇṭhagatairapi || tīrāddvyūtimātraṃ tu paritaḥ kṣetramucyate | atra dānaṃ tapo homo gaṅgāyāṃ nātra saṃśayaḥ || atrasthāstu divaṃ yānti ye mṛtāste'punarbhavāḥ | iti | ubhayatra taṭe pratyekaṃ krośadvayaṃ kṣetram | taduktam— bhaviṣye, gaṅgāsīmāṃ na laṅghante sarvapāpānyaśeṣataḥ | diśo daśa palāyante siṃhaṃ dṛṣṭvā yathā mṛgāḥ || ekayojanavistīrṇā kṣetrasīmā taṭadvayāt | iti | matsyapurāṇe “tīrthe na pratigṛhṇīyāt” ityādyuktam | tathā tatraiva, gaṅgāvikrayaṇādrājan viṣṇorvikrayaṇaṃ bhavet | janārdane tu vikrīte vikrītaṃ bhuvanatrayam || atra hastacatuṣṭayābhyantare pratigrahaniṣedhaḥ sarvatraiva | sārdhahastaśatābhyantare tu tanniṣedhaḥ praśastanadīṣu | kṣetre pratigrahaniṣedhastu gaṅgāyāmeva | tatraiva kṣetrakathanāditi