Tirthaprakasha 4.p212

4.p212

atha gaṅgāsmaraṇaphalam | bhaviṣye, bhavanāni vicitrāṇi vicitrābharaṇāḥ striyaḥ | ārogyaṃ vittasampattirgaṅgāsmaraṇajaṃ phalam || iti | atha kīrttanam | mahābhārate, darśanātsparśanātpānāttathā gaṅgetikīrttanāt | smaraṇādeva gaṅgāyāḥ sadyaḥ pāpānpramucyate || iti | atha gaṅgāgamanaphalam | brāhme, snānaṃ tu bhaktyā gaṅgāyāṃ kartukāmasya gacchataḥ | padepade'śvamedhasya phalaṃ martyasya jāyate || iti | atha vāsaphalam | nāradīye, kimaṣṭāṅgena yogena kiṃ tapobhiḥ kimadhvaraiḥ | vāsa eva hi gaṅgāyāṃ brahmajñānasya kāraṇam || iti | atha māsavāsaphalam | tiṣṭhedyugasahasraṃ tu pādenaikena yaḥ pumān | māsamātraṃ tu gaṅgāyāṃ samau syātāṃ na vā samau || iti | atha ādehapatanaṃ gaṅgopāsanaphalam | na bhayebhyo bhayaṃ tasya na pāpebhyo na rājataḥ | ādehapatanādgaṅgāmupāste yaḥ pumāniha || iti | atha namaskāraphalam | praṇametprātarutthāya gaṅgāṃ puṇyajalāṃ śubhām | yastu dharmārthakāmānāṃ tathā mokṣasya bhājanam || iti