Tirthaprakasha 4.p246

Tīrthaprakāśa 4.p246

Language: Sanskrit

4.p246

vāmanapurāṇe, pretarājo vaṇijaṃ kaścit pratyāha | gayāyāṃ tīrthajuṣṭāyāṃ snātvā śaucasamanvitaḥ | mama nāma samuddiśya piṇḍanirvapaṇaṃ kuru || tatra piṇḍapradānena pretabhāvādahaṃ sakhe | muktastu sarvadātṝṇāṃ prāpsyāmi śubhalokatām || ityevamuktvā vaṇijaṃ pretarājo'nujaiḥ saha | svanāmāni yathānyāyaṃ samyagākhyātavān śuciḥ || tathārcayitvā prayayau gayāśiramanuttamam | piṇḍanirvapaṇaṃ tatra pretānāmanupūrvaśaḥ || cakāra ca sa dāyādān pitṝṃścakre tvanantaram | ātmanaśca mahābuddhirmahābodhau tilairvinā || piṇḍanirvapaṇaṃ cakre tathānyānapi gotrajān | evaṃ datteṣu piṇḍeṣu vaṇijā pretabhāvataḥ || vimuktāste dvijāḥ prāpya brahmalokaṃ tato gatāḥ

Previous: 4.p245
Next: 4.p247.1
Up: 4

Linked texts (1)

Tīrthacintāmaṇi — Vācaspatimiśra, Sanskrit