Tirthaprakasha 4.p252

4.p252

sarvasthāneṣu caivaṃ syāt piṇḍadānaṃ tu nārada | pretaparvatamārabhya kuryāttīrtheṣu ca kramāt || itivāyupurāṇāt | ata eva vāyupurāṇe prathamadine mahānadyāṃ snānādikamevoktam | gayāyāśca praveśe tu pūrvato'sti mahānadī | tasyāstoyaṃ samāsādya snātavyaṃ tatra nirmalam || snātvā ca tarpaṇaṃ kuryāddevādīnāṃ yathāvidhi | apare'hni śucirbhūtvā gacchecca pretaparvatam || ityantena pretaparvataśrāddhamuktvā, nāmnā pretaśilā khyātā gayāyāṃ ca vimuktaye | iti coktam | prathamadine phalgubhinnamahānadībhāge snānam | dināntare phalgusnānavidhānāditi | gayāyāṃ tīrthaprāptinimittakamuṇḍanopavāsau na staḥ | daivāttaddine ekādaśīpāte'pi nopavāsa itibhramaḥ | pretaśilādau tu pitṛvyādīnāmekoddiṣṭaṃ pṛthageva kāryyam | aputrā ye mṛtāḥ kecit striyo vā puruṣāśca ye | teṣāmapi ca deyaṃ syādekoddiṣṭaṃ na pārvaṇam || itivacanāt | pitṛvyādiśrāddhaṃ tu naikaprayogeṇa | pitrādipārvaṇe tatpraveśaprāpakābhāvāt | pitaro yatra pūjyante tatra mātāmahā dhruvam | itivadatra tādṛśavacanābhāvāditi