Tirthaprakasha 4.p253

4.p253

tatra vāyupurāṇe, apare'hni śucirbhūtvā gacchecca pretaparvatam | brahmakuṇḍe tataḥ snātvā devādīṃstarpayetsudhīḥ || kṛtvā''hvānaṃ pitṝṇāṃ tu prayataḥ pretaparvate | prācīnāvītinā bhāvyaṃ dakṣiṇābhimukhaḥ smaran || kavyavālo nalaḥ somo yamaścaivāryamā tathā | agniṣvāttā barhiṣadaḥ somapāḥ pitṛdevatāḥ || āgacchantu mahābhāgā yuṣmābhī rakṣitāstviha | madīyāḥ pitaro ye ca kule jātāḥ sanābhayaḥ || teṣāṃ piṇḍapradānārthamāgato'smi gayāmimām | te sarve tṛptimāyāntu śrāddhenānena śāśvatīm || ācamyoktvā ca paścāṅgaṃ prāṇānāyamya yatnataḥ | punarāvṛttirahitabrahmalokāptihetave || evaṃ saṅkalpya vidhivat śrāddhaṃ kuryyādyathākramam | pitṝnāvāhya cābhyarcya mantraiḥ piṇḍaprado bhavet || tīrthe pretāśilādau ca carūṇā saghṛtena ca | prakṣālya pūrvataḥ sthānaṃ pañcagavyaiḥ pṛthakpṛthak || svairmantrairatha sampūjya pade ca padadevatām | yāvattilā manuṣyaistu gṛhītāḥ pitṛkarmaṇi || gacchanti bhītā asurāḥ siṃhatrastā yathā mṛgāḥ | dattvā śrāddhaṃ sapiṇḍānāṃ teṣāṃ dakṣiṇabhāgataḥ || kuśairāstīrya teṣāṃ tu sakṛddattvā tilodakam | gṛhītvāñjalinā tebhyaḥ pitṛtīrthena yatnataḥ || saktunā muṣṭimātreṇa dadyādakṣayapiṇḍakam | tilājyadadhimadhvādi piṇḍadravyeṣu yojayet || saṃbandhinastilādbhiśca kuśeśvāvāhayettataḥ | etāṃstu sarvamantrāṃśca strīliṅgāntān samūha ca || piṇḍān dadyādyathāpūrvaṃ pitṝnāvāhya pūrvavat | svagotre paragotre vā dampatyoḥ piṇḍapātane || apṛthaṅkiphalaṃ śrāddhaṃ piṇḍe codakatarpaṇam | piṇḍapātre tilān dattvā pūrayitvā śubhodakaiḥ || mantreṇānena piṇḍāṃstān pradakṣiṇakaraṃ yathā | pariṣiñcetridhā sarvān praṇipatya kṣamāpayet || pitṝn visṛjya cācamya sākṣiṇaḥ śrāvayetsurān | sarvasthāneṣu caivaṃ syāt piṇḍadānaṃ tu nārada || pretaparvatamārabhya kuryāttīrtheṣu ca kramāt | tilamiśrāṃstataḥ saktūn nikṣipet pretaparvate || pretatvāttu vimuktāḥ syuḥ pitarastasya nārada | pretatvaṃ tasya māhātmyādasya cāpi na vidyate || nāmnā pretaśilā khyātā gayāyāṃ tu vimuktaye | tīrthamūrttyādirūpeṇa sthita ādigadādharaḥ || iti