Tirthaprakasha 4.p269

4.p269

atha vāyupurāṇīyo gayāśrāddhānuṣṭhānakramo likhyate | sāmānyapraghaṭṭakoktarītyā gṛhādgayāyātrāṃ kṛtvā gayāprāptidine prathamaṃ phalgutīrthe gatvā omadyāśvamedhasahasrajanyaphalavilakṣaṇaphalaprāptikāmaḥ phalgutīrthe snānamahaṃ kariṣye iti saṅkalpya snāyāditi bahavaḥ| vastutaḥ prathamadine phalgubhinnamahānadībhāgādau snāyāt | dināntara eva phalgusnānavidhānāditi| tatra ca gṛhoktaḥ paurāṇikau vā vidhiḥ| tatastarpaṇamapi gṛhoktena paurāṇikena vā vidhinā kuryyāt | viśeṣastvayam | amukagotro'smatpitā'mukadevaśarmā tṛpyatāmetattilodakaṃ tasmai svadhā pitaraṃ prīṇayāmi | evaṃ pitāmahādīnāmapi svadhānte pitāmahaṃ prīṇayāmītiyojyam | tarpaṇaṃ nirvarttya devārcanādikaṃ kṛtvā adya tīrthaprāptinimittakapārbaṇaśrāddhamahaṃ kariṣye iti saṅkalpāgrghāvāhanarahitaṃ pārvaṇaṃ kuryyāt| tadasambhave piṇḍadānamātramapi tīrthaprāptinimittakaṃ kuryāt | gayāyāṃ vapanopavāsau na staḥ| etāvat prathamadinakṛtyam | miśrāstadanuyāyinaśca tīrthaprāptinimittakaśrāddhānantaraṃ pretaśilāyāṃ śrāddhaṃ yamarājabhramarājabalidānaparyyantaṃ vakṣyamāṇarītyā prathamadina eva kārayanti | tadasat | sarvasthāneṣu caivaṃ syāt piṇḍadānaṃ tu nārada | pretaparvatamārabhya kuryyāttīrtheṣu ca kramāt || itivāyupurāṇāt