Tirthaprakasha 4.p277.3

4.p277.3

tataḥ āpastvamasi deveśa jyotiṣāṃ patireva ca | pāpaṃ nāśaya me deva manovākkāyakarmajam || iti paurāṇikamantraṃ paṭhitvā manovākkāyakarmajapāpakṣayakāmanayā oṃ yamāyaipa balirnama iti kuśatrayajalena devarītyā pitṛrītyā vā bhaktādirūpaṃ valiṃ dadyāt | prabhāsādridakṣiṇadigavasthitapretaśilājaghanasthe naganāmni parvate oṃśvānau dvau śyāvaśavalau vaivasvatakulodbhavau | tābhyāṃ piṇḍaṃ prayacchāmi syātāmetāvahiṃsakau || iti paṭhitvā oṃ yamarājabhramarājābhyāmeṣa balirnama iti yāmyabalivat tayormilitayorodanādyanyatamavaliṃ dadyāt | idaṃ ca balidānaṃ nityam | akaraṇe'niṣṭaśruteḥ | anyattu sarvaṃ kāmyaṃ svatantraṃ ca yāvadiṣyate tāvadeva kāryam | atha tṛtīyadine pañcatīrthīkṛtyam | phalgutīrthe yathāvidhi snātvā devārcanāntaṃ karma kṛtvā pavitropagrahapāṇirācamya vāriṇā śiro'bhyukṣya uttaramānasaṃ gatvā omadya pāpakṣayakāma uttaramānase snānamahaṃ kariṣye iti saṅkalpya snānīyamantrān paṭhitvā oṃ uttare mānase snānaṃ karomyātmaviśuddhaye | sūryyalokādisaṃsiddhisiddhaye pitṛmuktaye || iti pāṭhitvā majjanaṃ kāryam | tatastarpaṇam | tatra ca pitrādyañjaliṣu svadhodīraṇānantaraṃ pitaraṃ prīṇayāmīti prayojyam| tatastarpaṇaśeṣe devavidhinā oṃ ābrahmastambaparyantaṃ devarṣipitṛmānavāḥ | tṛpyantu pitaraḥ sarve mātṛmātāmahādayaḥ || ityādimantraṃ paṭhitvā eko'ñjalirdeyaḥ | tataḥ pitrāditrayamātrāditrayamātāmahāditrayāṇāṃ śāśvatabrahmalokaprāptikāmo muktikāmo vā śrāddhaṃ kuryāt |