Tirthaprakasha 4.p330

4.p330

atha gokarṇamāhātmyam | bhārate, atha gokarṇamāsādya triṣu lokeṣu viśrutam | samudramadhye rājendra sarvalokanamaskṛtam || yatra brahmādayo devā munayaśca tapodhanāḥ | bhūtayakṣapiśācāśca kinnarāḥ samahoragāḥ || siddhacāraṇagandharvā mānuṣāḥ pannagāstathā | saritaḥ sāgarāḥ śailā upāsanta umāpatim || tatreśānaṃ samabhyarcya trirātropoṣito naraḥ | daśāśvamedhamāpnoti gāṇapatyaṃ ca vindati || upauṣya dvādaśaṃ rātraṃ kṛtātmā jāyate naraḥ | tasminneva tu gāyatryāḥ sthānaṃ trailokyaviśrutam || trirātramuṣitastatra gosahasraphalaṃ labhet | nidarśanaṃ ca pratyakṣaṃ brāhmaṇānāṃ narādhipa || gāyatrīṃ paṭhate yastu yonimaṅkarajo dvijaḥ | gāthā vā gāthikā vāpi tasya sampadyate nṛpa || abrāhmaṇasya paṭhataḥ sāvitrī tu praṇaśyati | iti | atha saptakoṭīśvaramāhātmyam | skānde prabhāsakhaṇḍe, samudratīre paramaṃ tejoliṅgaṃ durāsadam | yatra siddhāḥ purā vatsa munayaḥ saptakoṭayaḥ || saptakoṭīśvaraṃ nāma tataḥ prabhṛti nārada | tasya liṅgasya māhātmyaṃ mayā vaktuṃ na śakyate || smaraṇādyasya liṅgasya gosahasraphalaṃ labhet | samudre vidhivat snātvā saptakoṭīśvaraṃ śivam || ye drakṣyanti mahātmāno muktibhājo bhavanti te | rājasūyasya yajñasya sahasraguṇitaṃ phalam || yathā gomedhayajñasya darśanāttatphalaṃ tviha | saptakoṭīśvaro devo dṛṣṭaścedbhuvi mānavaiḥ || dhanyāsta eva loke'smisteṣāṃ muktiḥ kare sthitā | tatra snānaṃ japo homo dānaṃ ca pitṛtarpaṇam || sarvaṃ tadakṣayaṃ proktaṃ saptakoṭīśvare śive | iti | atha setubandhamāhātmyam | mahāpātakyanuvṛttaucyavanaḥ, āsetudarśanātpūto bhavatyaśvamedhāvabhṛthasnānācchuddho bhavatyubhayaśirasaṃ vā pradāya brāhmaṇebhyaḥ pūto bhavati | ubhayaśirasam, ubhayatomukhīm | pārāśaraḥ caturvidyopasampanno brahmahā gurutalpagaḥ | setuṃ paśyetsamudrasya prāyaścittaṃ vinirdiśet || setubandhaṃ tathā paśyellaṅkāmārgaṃ mahodadheḥ | daśayojanavistīrṇaṃ śatayojanamāyatam || rāmabhadrapramādeśādbalasañcayasañcitam