Tirthaprakasha 4.p336

4.p336

pūjādhikāriṇaḥskandapurāṇe, pūjādhikāriṇaḥ sarve brahmakṣatraviśastathā | anyeṣām darśanaṃ bhaktyā tathā nāmānukīrttanam || iti | pūjā ca dvādaśākṣaramantravanmantrāntareṇāpi | tathācaskandapurāṇe, pūjayenmantrarājena sūktena puruṣasya ca | dvādaśākṣaramantreṇa yatra vā jāyate ruciḥ || dvādaśākṣareti phalaviśeṣabalena | tathā catatraiva, gatvā gatvā nivarttante candrasūryādayo grahāḥ | adyāpi na nivarttante dvādaśākṣaracintakāḥ || yattatsarvaṃ vaiṣṇavaṃ karma pratiṣṭhādiprakalpitam | tadanenaiva kartavyaṃ viṣṇuprītikarāṇi vai | sarveṣāṃ mahimāvāptirasya saṃsevanādbhavet || svāyambhuvo manurimaṃ jajāpa mantramuttamam | prajāpatistaṃ samprāpya sasarja sacarācaram || iti | oṃnamo bhagavate vāsudebāyeti dvādaśākṣaro mantraḥ | pūjāntaraṃ prasādanambrahmapurāṇe, jaya kṛṣṇa jagannātha jaya sarvāghanāśana | jaya cāṇūrakeśina jaya kaṃsaniṣūdana || jaya padmapalāśākṣa jaya cakragadādhara | jaya nīlāmbudaśyāma jaya sarvasukhaprada || jaya deva jagatpūjya jaya saṃsāranāśana | jaya lokapate nātha jaya vāñchāphalaprada || saṃsārasāgare ghore nistāre duḥkhaphenile | krodhagrāhākule raudre viṣayodakasaṃplave || nānārogormikalile mohāvarttasudustare | nimagno'haṃ suraśreṣṭha trāhi māṃ puruṣottama || evaṃ pramādya deveśaṃ varadaṃ bhaktavatsalam | sarvapāpaharaṃ devaṃ sarvakāmaphalapradam || pīnāṃsaṃ dvibhujaṃ kṛṣṇaṃ padmapatrāyatekṣaṇam | mahāraskaṃ mahābāhuṃ pītavastraṃ śubhānanam || śaṅkhacakragadāpāṇiṃ mukuṭāṅgadabhūṣaṇam | sarvalakṣaṇasaṃyuktaṃ vanamālāvibhūṣitam || dṛṣṭvā naro'ñjaliṃ kṛtvā daṇḍavatpraṇipatya ca | aśvamedhasahasrāṇāṃ phalaṃ prāpnoti bho dvijāḥ || yatphalaṃ sarvatīrtheṣu snānadāne prakīrtitam | narastatphalamāpnoti dṛṣṭvā kṛṣṇaṃ praṇamya ca || yatphalaṃ sarvavedeṣu sarvayajñeṣu yatphalam | tatphalaṃ samavāpnoti dṛṣṭvā kṛṣṇaṃ praṇamya ca || yatphalaṃ sarvadānena vratena niyamena ca | narastatphalamāpnoti dṛṣṭvā kṛṣṇaṃ praṇamya ca || tapobhirvividhairugraistapobhiryadupārjitam | narastatphalamāpnoti dṛṣṭvā kṛṣṇaṃ praṇamya ca || yatphalaṃ brahmacaryeṇa samyakcīrṇena kīrttitam | narastatphalamāpnoti dṛṣṭvā kṛṣṇaṃ praṇamya ca || gārhasthyena yathoktena yatphalaṃ samudāhṛtam | narastatphalamāpnoti dṛṣṭvā kṛṣṇaṃ praṇamya ca || kiñcātra bahunoktena māhātmyaṃ tasya bho dvijāḥ | dṛṣṭvā kṛṣṇaṃ naro bhaktyā mokṣaṃ prāpnoti durlabham || pāpairvimuktaḥ śuddhātmā kalpakoṭisamudbhavaiḥ | śriyā paramayā yuktaḥ sarvaiḥ samudito guṇaiḥ || sarvakāmasamṛddhena vimānena suvarcasā | trisaptakulamuddhṛtya naro viṣṇoḥ puraṃ vrajet || tataḥ kalpaśataṃ yāvat bhuktvā bhogān manoramān | gandharvāpsarasaiḥ sārddhaṃ yathā viṣṇuścaturbhujaḥ || cyutastasmādihāyāto viprāṇāṃ pravare kule | sarvajñaḥ sarvavedī ca jāyate gatamatsaraḥ || svadharmanirataḥ śānto dātā bhūtahite rataḥ | āsādya vaiṣṇavaṃ jñānaṃ tato muktimavāpnuyāt