Tirthaprakasha 4.p337

4.p337

tathā, tataḥ sampūjya mantreṇa subhadrāṃ bhaktavatsalām | prasādayecca bho viprāḥ praṇipatya kṛtāñjaliḥ || namaste sarvage devi namaste śubhasaukhyade | trāhi māṃ padmapatrākṣi kātyāyani namo'stu te || evaṃ prasādya tāṃ devīṃ jagaddhātrīṃ jagaddhitām | baladevasya bhaginīṃ subhadrāṃ varadāṃ śivām || kāmagena vimānena naro viṣṇupuraṃ vrajet | ābhūtasamplavaṃ yāvat krīḍitvā tatra devavat || iha mānuṣatāṃ prāpto brāhmaṇo vedavidbhavet | prāpya yogaṃ harestatra mokṣaṃ ca labhate dhruvam || evaṃ dṛṣṭvā balaṃ kṛṣṇaṃ subhadrāṃ praṇipatya ca | dharmaṃ cārthaṃ ca mokṣaṃ ca kāmaṃ ca labhate dhruvam || niṣkramya devatāgārāt kṛtakṛtyo bhavennaraḥ | praṇamyāyatanaṃ paścāt vrajettatra samāhitaḥ || indranīlamayo viṣṇuryatrāste vālukāvṛtaḥ | antarddhāne'pi taṃ natvā tato viṣṇupuraṃ vrajet || sarvadevamayo yo'sau hatavānasurottamam | āste sa tatra bho viprāḥ siṃhārddhakṛtavigrahaḥ || bhaktyā dṛṣṭvā tu taṃ devaṃ praṇamya narakesarim | mucyate pātakairmartyaḥ samastairnātra saṃśayaḥ | narasiṃhasya ye bhaktā bhavanti bhuvi mānavāḥ || na teṣāṃ duṣkṛtaṃ kiñcit phalaṃ ca syādyadīpsitam | tasmātsarvaprayatnena narasiṃhaṃ samāśrayet || dharmārthakāmamokṣāṇāṃ phalaṃ yasmātprayacchati | tasmāttaṃ muniśārdūlā bhaktyā sampūjayetsadā || mṛgarājaṃ mahāvīryyaṃ sarvakāmaphalapradam | brāhmaṇāḥ kṣatriyā vaiśyāḥ striyaḥ śūdrāntyajātayaḥ || sampūjya taṃ suraśreṣṭhaṃ narasiṃhavapurdharam | mucyante cāśubhairduḥkhairjanmakoṭisamudbhavaiḥ || dropalakṣakam | brahmapurāṇe prāk trayāṇāmeva tatra pūjāpratipādanāt | ata eva pañcatīrthīkaraṇe dvau devau trīṇi tīrthānīti paṭhanti ayamatra kramaḥ | ādau mārkaṇḍeyahradasnānādi | tato mārkaṇḍeyeśvaradarśanaṃ tatpūjanaṃ ca | tato'kṣayavaṭe gatvā tatpradakṣiṇapraṇāmapūjādi | tataḥ kṛṣṇapuraḥsthitavainateyanamaskāraḥ | tato viṣṇorāyatanadvāri puruṣottamasaṅkarṣaṇasubhadrāṇāṃ darśanaṃ kuryāt | tataḥ saṅkarṣaṇapūjā | tataḥ puruṣottamapūjā | tataḥ puruṣottamadarśanam | tataḥ subhadrāpūjā | tataḥ pratyekaṃ prasādanam | tataḥ puruṣottamadakṣiṇe'kṣayavaṭavāyavye vālukācchannanīlamādhavapratimāpraṇāmaḥ | tato narasiṃhapūjā | tato'nantākhyavāsudevadarśanādi | tataḥ śvetamādhavapraṇāmādi | tataḥ śvetagaṅgāsnānapūrvaka matsyamādhavadarśanādi| tataḥ pūrvoktarītyā sāgarasnānādi | tata indradyumnasaraḥsnānādi | tattadvākyānusārāt saṅkalpo vidheya iti | brahmapurāṇe, evaṃ kṛtvā pañcatīrthīmekādaśyāmupoṣitaḥ | jyeṣṭhaśuklasya dvādaśyāṃ yaḥ paśyetpuruṣottamam || sa pūrvoktaṃ phalaṃ prāpya krīḍitvā cācyutānvaye | prayāti paramaṃ sthānaṃ yasmānnāvarttate punaḥ || tatraiva, śṛṇudhvaṃ muniśārdūlāḥ pravakṣyāmi samāsataḥ | jyeṣṭhamāsaṃ yathā tebhyaḥ praśaṃsāmi punaḥ punaḥ || pṛthivyāṃ yāni tīrthāni saritaśca sarāṃsi ca | puṣkariṇyastaḍāgāni vāpyaḥ kūpāstathā hradāḥ || nānānadyaḥ samudrāśca saptāhaṃ puruṣottame