Tirthaprakasha 4.p338

4.p338

jyeṣṭhaśukladaśamyādi pratyakṣaṃ yānti sarvadā || snānadānādikaṃ tasmāddevatāvekṣaṇaṃ dvijāḥ | yatkiñcitkriyate tatra tasmin kāle'kṣayaṃ bhavet || śuklapakṣasya daśamī jyeṣṭhe māsi dvijottamāḥ | harate daśa pāpāni tasmāddaśaharā smṛtā || yastasyāṃ halinaṃ kṛṣṇaṃ paśyedbhadrāṃ susaṃyataḥ | sarvapāpavinirmukto viṣṇulokaṃ vrajennaraḥ || uttare dakṣiṇe vimāstvayane puruṣottamam | dṛṣṭvā rāmaṃ subhadrāṃ ca viṣṇulokaṃ vrajennaraḥ || naro dolāgataṃ dṛṣṭvā govindaṃ puruṣottamam | phālgunyāṃ saṃyato bhūtvā govindasya puraṃ vrajet || viṣṇostu divase prāpte pañcatīrthīṃ vidhānataḥ | kṛtvā saṅkarṣaṇaṃ kṛṣṇaṃ dṛṣṭvā bhadrāṃ ca bho dvijāḥ || naraḥ samastayajñānāṃ phalaṃ cāpnoti durlabham | vimuktaḥ sarvapāpebhyo viṣṇulokaṃ sa gacchati || yaḥ paśyati tṛtīyāyāṃ kṛṣṇaṃ candanabhūṣitam | vaiśākhasya site pakṣe sa yātyacyutamandiram || jyaiṣṭhyāṃ jyeṣṭharkṣayuktāyāṃ yaḥ paśyetpuruṣottamam | kulaikaviṃśamuddhṛtya viṣṇulokaṃ sa gacchati | yadā bhavenmahājyeṣṭhī śaśinakṣatrayogataḥ || prayatnena tadā martyairgantavyaṃ puruṣottamam | kṛṣṇaṃ dṛṣṭvā mahājyaiṣṭhyāṃ rāmaṃ bhadrāṃ ca bho dvijāḥ || naro dvādaśayātrāyāḥ phalaṃ prāpnoti cādhikam| tathā, pṛthivyāṃ sarvatīrtheṣu hareśrcāyataneṣu ca || sāgareṣu ca śaileṣu nadīṣu ca saraḥsu ca || yatphalaṃ snānadānena rāhugraste divākare | tatphalaṃ kṛṣṇamālokya mahājyaiṣṭhayāṃ labhennaraḥ