Tirthaprakasha 4.p340
Tīrthaprakāśa 4.p340
- Language
- Sanskrit
4.p340
brahmapurāṇe, tasmājjyaiṣṭhayāṃ samuddhṛtya hemādyaiḥ kalaśairjalam | kṛṣṇarāmābhiṣekārthaṃ subhadrāyāśca bho dvijāḥ || kṛtvā suśobhitaṃ mañcaṃ patākābhiralaṅkṛtam| sudṛḍhaṃ sukhasañcāraṃ vastraiḥ puṣpairalaṅkṛtam || vistīrṇaṃ dhūpitaṃ dhūpaiḥ snānārthaṃ rāmakṛṣṇayoḥ | sitavastraparicchannaṃ muktāhārāvalambitam || tatra nānāvidhairvādyaiḥ kṛṣṇaṃ nīlāmbaraṃ dvijāḥ | sthāpya mañce subhadrāṃ ca jayamaṅgalaniḥsvanaiḥ || brāhmaṇaiḥ kṣatriyairvaiśyaiḥ śūdraiścānyaiśca jātibhiḥ | anekaśatasāhasrairvṛtaṃ strīpuruṣairdvijāḥ || gṛhasthāḥ snātakāścaiva yatayo brahmacāriṇaḥ | snāpayanti tadā kṛṣṇaṃ mañcasthaṃ sahalāyudham || tathā samastatīrthāni pūrvoktāni dvijottamāḥ | svodakaiḥ puṣpamiśraiśca snāpayanti pṛthakpṛthak || paścātpaṭahasaṅghādyairbherīmurajanisvanaiḥ | kāhalaistālaśabdaiśca mṛdaṅgairvividhaistathā || tathā, tasmin kāle tu ye martyāḥ paśyanti puruṣottamam | balabhadraṃ subhadrāñca te yānti padamavyayam || tathā, snātaṃ paśyanti ye kṛṣṇaṃ vrajantaṃ dakṣiṇāmukham | brahmahatyādibhiḥ pāpairmucyante nātra saṃśayaḥ || skandapurāṇe, adhivāsādikaṃ tatra yaiḥ kṛtaṃ snānakarmaṇi | teṣāṃ śraddhāmudā yuktaḥ pradadyāddakṣiṇāḥ pṛthak || brāhmaṇebhyaśca miṣṭānnaṃ vastrālaṅkaraṇādikam | pradadyācchraddhayā yukto dīnānāthāṃśca tarpayet | ye draṣṭumāgatāḥ snānaṃ jīvanmuktāstu te dhruvam || tānyathāśakti vai rājā mānayetprītaye hareḥ | snāvaśiṣṭatoyena snānāṅgadvāsanāsthitā || nārī vā puruṣo vāpi tasya puṇyaṃ vadāmi vaḥ | kalpaḥ syācciraraugārtto hyapamṛtyuṃ jayedasau || aputrā mṛtavatsā vā vandhyā vāpi labhet sutam | subhagaḥ sarvalokānāṃ nirddhano dhanavān bhavet || garbhiṇī labhate putraṃ dīrghāyurguṇavattaram | gaṅgādisarvatīrthānāṃ snānajaṃ phalamaśnute || kuṣṭhavyādhiyuto yo vai sarvāṅgaṃ parilepayet | naśyate nātra sandeho vāgmī syācchāstrakovidaḥ || nātaḥ pavitraṃ bho viprāḥ svardhunyambhaḥ prakīrttitam || yadyatkāmayate citte aihikāmuṣmikaṃ tathā | viṣṇoḥ snānāvaśeṣeṇa toyena labhate dhruvam || iti | athātra prāṇatyāgaphalam | brahmapurāṇe, puramaghye punarbhāti mandiraṃ ratnabhūṣitam | ityādyupakramya-