Tirthaprakasha 4.p342

4.p342

tasmin kṣetravare ramye bhāskeśvarasaṃjñitam | paśyanti taṃ tu ye devaṃ snātvā kuṇḍe maheśvaram || ādityenārcitaṃ pūrvaṃ devadevaṃ trilocanam | sarvapāpavinirmuktā vimānavaramāsthitāḥ || upagīyamānā gandharvaiḥ śivalokaṃ vrajanti vai | bhuktvā tatra varān bhogān yāvadābhūtasamplavam || puṇyakṣayādihāgatya dhārmikāśca bhavanti vai | yajvāno dānaśīlāśca pṛthivyāḥ patayastathā || muktīśvaraṃ ca siddheśaṃ svarṇajāleśvaraṃ tathā | parameśvaraṃ ca vikhyātaṃ śubhaṃ cāmrātikeśvaram || ye paśyanti svarcayitvā snātvā bindusaro'mbhasi | sarvapāpavinirmuktā vimānavaramāsthitāḥ || upagīyamānā gandharvaiḥ śivalokaṃ vrajanti vai | tathā, ekāmrake śivakṣetre vārāṇasīsame śubhe | snānaṃ karoti yastatra sa lokaṃ labhate śubham || yasmiṃstasmiṃstithau viprāḥ snātvā bindusaro'mbhasi | paśyeddevaṃ virūpākṣaṃ devīṃ ca varadāṃ śivām || gaṇaṃ caṇḍaṃ kārttikeyaṃ gaṇeśaṃ vṛṣabhaṃ tathā | kalpadrumaṃ ca sāvitrīṃ śivalokaṃ sa gacchati || iti