Tirthaprakasha 4.p43

4.p43

araṇye tṛṣare kṣetre puṇyaṃ yatsamudāhṛtam | tadetatkālamāhātmyāduparāge'dhikaṃ bhavet || ye ca āhṛtya toyena snānaṃ kuryurgṛhe'pi vā | samantreṇaiva pūtena teṣāṃ puṇyaṃ tato'dhikam || ātmavittānusāreṇa pātre taijasapārthive | iṣṭakāśailakāṣṭhairvā phalaṃ prāpnotyaninditam || ye caiva mṛttikāṃ tasmāttīrthādāhṛtya bhomune | prātaḥ prātaḥ samutthāya vandayanti narottamāḥ || te sarvapāpanirmuktā bhavanti vigatārmayāḥ | phalapuṣpopahāreṇa yo vā tasmin harīśvarau || snātvā sampūjayedvipraḥ sa bhavedvigatārmayaḥ | mantrapūtena toyena kumbhaiḥ puṇyajalānvitaiḥ || saphalairvidhinā snātvā sarvakāmāṃllabheta saḥ | tadetatkathitaṃ puṇyaṃ mayā puṇyamukhācchratam || tatsamagraṃ bhavettasya araṇyeṣūṣareṣu ca | iti | śivapurāṇe, vyāsa uvāca | aṣṭaṣaṣṭristu ye proktā śivasya paramātmanaḥ | tānahaṃ śrotumicchāmi tattvena kathayasva me || sanatkumāra uvāca | mandarasthaṃ sukhāsīnaṃ brahmā pṛcchati śaṅkaram | keṣu keṣu ca sthāneṣu draṣṭavyo'si mayā prabho || maheśvara uvāca | vārāṇasyāṃ mahādevaṃ prayāge tu maheśvaram | naimiṣe devadevaṃ tu gayāyāṃ prapitāmaham || kurukṣetre viduḥ sthāṇuṃ prabhāse śaśibhūṣaṇam | puṣkare tu ayogandhiṃ viśvaṃ ca vimaleśvare || viśvaṃ viśveśvare tathā iti kvacitpāṭhaḥ | aṭṭahāse mahānādaṃ mahendre tu mahāvratam | ujjayinyāṃ mahākālamākoṭe ca mahotkaṭam || marukoṭe iti kvacitpāṭhaḥ | śaṅkukarṇe mahātejaṃ gokarṇe tu mahānalam | rudrakoṭyāṃ mahāyogaṃ mahāliṅgaṃ sthaleśvare || harṣaṃ harṣapathe caiva sarvaṃ madhyamakeśvare | kedāre devamīśānaṃ rudraṃ rudramahā naye || suvarṇākhye sahasrākṣaṃ vṛṣe ca vṛṣabhadhvajam | bhairave bhairavākāraṃ bhavaṃ vastrāpathe viduḥ || ugraṃ kanakhale caiva bhadrakarṇahrade śivam | devadāruvane daṇḍi caṇḍīśaṃ kurujāṅgale || ūrdhvaretaṃ duraṇḍe tu chāgalāṇḍe kapardinam | kṛttivāse tu varadaṃ sūkṣmamātrātikeśvare || kālañjare nīlakaṇṭhaṃ śrīkaṇṭhaṃ maṇḍaleśvare | dhyānayogeśvare yogaṃ gāyatryāṃ cottare śvaram || mama liṅge viduḥ kālaṃ kapālīṃ karavīrake | kāmāvarohaṇe nandi devikāyāmumāpatim || hariścandre hariścaiva puriścandre tu śaṅkaram | jaṭi vāṇeśvare vidyāt saumyaṃ kukkuṭakeṣu ca || tryambakaṃ cāpi sandhyāyāṃ virajāyāṃ trilocanam | jalpīśvare triśūlīṃ tu śrīśaile tripurāntakam || nepāle vai paśupatiṃ dīptamaṅge śvare viduḥ | gaṅgāsāgare hyamaramoṅkāramamarakaṇṭake || saptagodāvare bhīmaṃ pātāle hāṭakeśvaram | karṇikāre gaṇādhyakṣaṃ kailāśe tu gaṇādhipam || hemakūṭe virūpākṣaṃ bhūrbhuvaṃ gandhamādane | siddheśvaraṃ tu ākāśe jājaliṅge jalapriyam || bhūteśvare bhasmagātraṃ kairātaṃ ca kirātake | bhikṣukaṃ kuvikāyāṃ tu vārāhaṃ vindhyaparvate || gaṅgāhrade himasthāne analaṃ vaḍavāmukhe | śreṣṭhaṃ koṭīśvarītīrthe variṣṭhaṃ viṣṭakāpathe || śrīkusumapure prahāsaṃ laṅkāyāmalakeśvaram | aṣṭaṣaṣṭistu nāmāni devadevasya cāśraman || purāṇe copagītāni brahmaṇā ca mahātmanā | yaḥ śuciḥ prayato bhūtvā ubhe sandhye paṭhennaraḥ || daśānāmaśvamedhānāṃ phalaṃ prāpnoti mānavaḥ | matsyapurāṇe devyā guhyatīrthāni guhyanāmāni coktāni | yathā, ṛṣaya ūcuḥ | kasmāddākṣāyaṇī pūrvaṃ dadāhātmānamātmanā | himavadduhitā tadvat kathaṃ jātā mahītale || saṃharantī kimuktā vā stutā vā brahmasūnunā | dakṣeṇa lokajananī sūta vistarato vada || sūta uvāca | dakṣasya yajñe vitate prabhūtavaradakṣiṇe | samāhūteṣu deveṣu provāca pitaraṃ satī || kimarthaṃ tāta bharttā me yajñe'sminna nimantritaḥ | ayogya iti tāṃ prāha dakṣo yajñeṣu śūlabhṛt || upasaṃhārakṛdrudrastenāmaṅgalabhāgayam | prakopācca satī tasmiṃstyakṣye dehaṃ tvadudbhavam || vaṃśānāṃ tvaṃ ca bhavitā pitṝṇāmekaputrakaḥ | kṣatriyātve 'śvamedhaśca rudrādvai nāśameṣyati || ityuktvā yogamāsthāya svadehodbhavatejasā