Tirthaprakasha 4.p42

4.p42

evaṃ parvasu sarveṣu candre sarvakalāsu ca || tṛtīyāyāṃ tu vaiśākhyāmaṣṭamyāṃ kujavāsare | caturddaśyāṃ ca kṛṣṇāyāṃ bhaumāhe pitṛtarpaṇam || karttavyaṃ sarvakāmānāṃ pūraṇāya dvijottamaiḥ | amāvāsyāṃ ca saṅkrāntau śivāvityau ca yo naraḥ || yajate bhaktimān pūtaḥ sa pūto bhavate mune | kārttike grahaṇaṃ śreṣṭhaṃ gaṅgāyamunasaṅgame || mārge tu grahaṇaṃ puṇyaṃ devikāyāṃ mahāmune | pauṣe tu narmadā puṇyā māghe sannihitā śubhā || phālgune varaṇā khyātā caitre puṇyā sarasvatī | vaiśākhe tu mahāpuṇyā candrabhāgā saridvarā || jyeṣṭhe tu kauśikī puṇyā āṣāḍhe tāpikā nadī | śrāvaṇe sindhunāmā ca bhādramāse ca gaṇḍakī || āśvine sarayūścaiva bhūyaḥ puṇyā tu narmadā | godāvarī mahāpuṇyā candre rāhusamanvite || sūryye caiva śaśigraste tamobhūte mahāmune | narmadātoyasaṃsparśāt kṛtakṛtyā bhavanti te || ye sūrye saiṃhikeyena graste revājalaṃ narāḥ | spṛśanti cāvagāhante na te prakṛttimānavāḥ || spṛṣṭvā śatakratuphalaṃ dṛṣṭvā godānajaṃ phalam | snātvā'śvamedhatulyaṃ ca pītvā sautrāmaṇiṃ labhet || ravicandroparāge tu ayane cottare tathā | evaṃ gaṅgāpi draṣṭavyā tadvadeva sarasvatī || tathā, śivādityaphalaṃ yacca maṇḍale samudāhṛtam | saṃgrāhamaṇḍale yāge tadatra prāpnuyānnaraḥ