Tirthaprakasha 4.p47

4.p47

teṣāṃ tat paramaṃ jñānaṃ dadāmyante paraṃ padam | prayāgaṃ naimiṣaṃ puṇyaṃ śrīśailo'tha mahālayaḥ || kedāraṃ bhadrakarṇaṃ ca gayā puṣkarameva ca | kurukṣetraṃ rudrakoṭirnarmadā''mrātakeśvaram || śālagrāmaṃ ca kubjāmraṃ kokāmukhamanuttamam | prabhāsaṃ vijayeśānaṃ gokarṇaṃ bhadrakarṇakam || etāni puṇyasthānāni trailokye viśrutāni tu | na yāsyanti paraṃ mokṣaṃ vārāṇasyāṃ yathā mṛtāḥ || vārāṇasyāṃ viśeṣeṇa gaṅgā tripathagāminī | praviṣṭā nāśayetpāpaṃ janmāntaraśataiḥ kṛtam || anyatra sulabhā gaṅgā śrāddhaṃ dānaṃ tapo japaḥ | vratāni sarvamevaitadvārāṇasyāṃ sudurlabham || yajeta juhuyānnityaṃ dattvābhyarcayate'marān | vāyubhakṣaśca satataṃ vārāṇasyāṃ sthito naraḥ || yadi pāpo yadi śaṭho yadi vā dhārmiko naraḥ | vārāṇasīṃ samāsādya punāti sakalaṃ naraḥ || vārāṇasyāṃ mahādevaṃ ye'rcayanti stuvanti ca | sarvapāpavinirmuktāste vijñeyā gaṇeśvarāḥ || anyatra yogajñānābhyāṃ saṃnyāsādatha vā'nyataḥ | prāpyate tat paraṃ sthānaṃ sahastreṇaiva janmanām || ye bhaktā devadeveśe vārāṇasyāṃ vasanti vai | te vindanti paraṃ mokṣamekenaiva tu janmanā || yatra yogastathā jñānaṃ muktirekena janmanā | avimuktaṃ tadāsādya nānyaṃ gacchettapovanam || yato mayā na muktaṃ tadavimuktaṃ tataḥ smṛtam | tadeva guhyaṃ guhyānāmetadvijñāya mucyate || jñānājñānātiniṣṭhāyāṃ paramānandamicchatām | yā gatirvihitā subhru sā'vimukte mṛtasya tu || yāni caivāvimuktasya dehe tūktāni kṛtsnaśaḥ | purī vārāṇasī tebhyaḥ sthānebhyo hyadhikā śubhā || yatra sākṣānmahādevo dehānte svayamīśvaraḥ | vyācaṣṭe tārakaṃ brahma tatraiva hyavimuktakam || yattat parataraṃ tattvamavimuktamiti śrutam | ekena janmanā devi vārāṇasyāṃ tadāpnuyāt || bhrūmadhye nābhimadhye ca hṛdayena ca mūrddhani | yathā 'vimuktamāditye vārāṇasyāṃ vyavasthitam || varuṇāyāstathā cāsyā madhyaṃ vārāṇasī purī | tatraiva saṃsthitaṃ tattvaṃ nityamevāvimuktakam || vārāṇasyāḥ paraṃ sthānaṃ na bhūtaṃ na bhaviṣyati | yathā nārāyaṇāddevo mahādevāddiveśvaraḥ || tatra devāḥ sagandharvāḥ sayakṣoragarākṣasāḥ | upāsate māṃ satataṃ devadevaṃ pitāmaham || mahāpātakino ye ca ye tebhyaḥ pāpakṛttamāḥ | vārāṇasīṃ samāsādya te yānti paramāṃ gatim || tasmānmumukṣurniyato vasedvai maraṇāāntikam | vārāṇasyāṃ mahādevāt jñānaṃ labdhvā vimucyate || kintu vighnā bhaviṣyanti pāpopahatacetasaḥ | tato naivācaretpāpaṃ kāyena manasā girā || etadrahasyaṃ devānāṃ purāṇānāṃ ca suvrate | avimuktāśrayaṃ jñānaṃ na kaścidvetti tattvataḥ || devatānāmṛṣīṇāṃ ca śṛṇvatāṃ parameṣṭhini | devyai devena kathitaṃ sarvapāpapraṇāśanam || yathā nārāyaṇaḥ śreṣṭho devānāṃ puruṣottamaḥ | yatheśvarāṇāṃ giriśaḥ sthānānāṃ caitaduttamam || yaiḥ samārādhito rudraḥ sarvasminneva janmani | te vidanti paraṃ kṣemamavimuktaṃ śivālayam || kalikalmaṣasambhūtā yeṣāmupahatā matiḥ | na teṣāṃ vidituṃ śakyaṃ sthānaṃ tatparameṣṭhinaḥ || ye smaranti sadā kālaṃ vadanti ca purīmimām | teṣāṃ vinaśyati kṣipramihāmutra ca pātakam | yāni ceha prakurvanti pātakāni kṛtālayāḥ || nāśayettāni sarvāṇi devaḥ kālatanuḥ śivaḥ | āgacchadhvamidaṃ sthānaṃ sevitaṃ mokṣakāṅkṣiṇām || mṛtānāṃ ca punarjanma na bhūyo bhavasāgare | tasmātsarvaprayatnena vārāṇasyāṃ vasennaraḥ || yogī vāpyathavā'yogī pāpī vā puṇyakṛttamaḥ | na vedavacanāt pitrorna caiva guruvādataḥ | matirutkramaṇīyā syādavimuktagatiṃ prati || sūta uvāca | ityevamuktvā bhagavān vyāso vedavidāmbaraḥ | sahaiva śiṣyapravarairvārāṇasyāṃ cakāra ha || kalpanarau matsyapurāṇe, īśvara uvāca | vārāṇasīti bhuvanatrayasārabhūtā ramyā sadā mama purī girirājaputri | atrāgatā vividhaduṣkṛtikāriṇo'pi pāpakṣayādvirajasaḥ pratibhānti martyāḥ || evaṃ smṛtaṃ priyatamaṃ mama devi nityaṃ kṣetraṃ vicitrataragulmalatāsupuṣpam | asminmṛtāstanubhṛtaḥ padamāpnuvanti mokṣākhyameva manasāpi na saṃśayo'tra || tathā idaṃ guhyatamaṃ kṣetraṃ sadā vārāṇasī mama | sarveṣāmeva jantūnāṃ heturmokṣasya sarvadā || asmin siddhāḥ sadā devi madīyavratamāśritāḥ | nānāliṅgadharā nityaṃ mama lokābhikāṅkṣiṇaḥ || abhyasyanti paraṃ yogaṃ muktātmāno jitendriyāḥ