Tirthaprakasha 4.p46

4.p46

avimukte tava kṣetre sarveṣāṃ muktisiddhaye | ahaṃ sannihitastatra pāṣāṇapratimādiṣu || kṣetre'smin yo'rcayedbhaktyā mantreṇānena māṃ śiva | brahmahatyādipāpebhyo mokṣayiṣyāmi mā śucaḥ || tvatto vā brahmaṇo vāpi ye labhante ṣaḍakṣaram | jīvanto mantrasiddhāḥ syurmuktā māṃ prāpnuvanti te || mumūrṣordakṣiṇe karṇe yasya kasyāpi vā svayam | upadekṣyasi manmantraṃ sa mukto bhavitā śiva || itirāmacandreṇoktam | yo'vimuktaṃ paśyati sa janmāntaritān doṣānnāśayatīti | kūrmapurāṇe, devyuvāca | devadeva mahādeva bhaktānāmārttināśana | kathaṃ tvāṃ puruṣo devamacirādeva paśyati || sāṅkhyaṃ yogastathā dhyānaṃ karmayogo'tha vaidikaḥ | āyāsabahulā loke yāni cānyāni śaṅkara || yena viśrāntacittānāṃ yogināṃ kamiṇāmapi | dṛśyo hi bhagavan sūkṣmaḥ sarveṣāmatha dehinām || etadguhyatamaṃ jñānaṃ gūḍhabrahmādisevitam | hitāya sarvabhaktānāṃ brūhi kāmāṅganāśana || īśvara uvāca | avācyametadvijñānaṃ jñānamairbahiṣkṛtam | vakṣye tava yathātattvaṃ yaduktaṃ paramarṣibhiḥ || paraṃ guhyatamaṃ kṣetraṃ mama vārāṇasī purī | sarveṣāmeva bhūtānāṃ saṃsārārṇavatāriṇī || tatra bhaktā mahādevi madīyaṃ vratamāśritāḥ | nivasanti mahātmānaḥ paraṃ niścayamāsthitāḥ || uttamaṃ sarvatīrthānāṃ sthānānāmuttamaṃ ca tat | jñānānāmuttamaṃ jñānamavimuktaṃ paraṃ mama || sthānāntaraṃ pavitrāṇi tīrthānyāyatanani ca | śmaśānasaṃsthitānyeva divyabhūmigatāni ca || bhūrloke naiva saṃlaggramantarikṣe mamālayam | amuktāstatra paśyanti muktāḥ paśyanti cetasā || śmaśānametadvikhyātamavimuktamitiśrutam | kālo bhūtvā jagadidaṃ saṃharāmyatra sundari || devīdaṃ sarvaguhyānāṃ sthānaṃ priyatamaṃ mama | madbhaktāstatra gacchanti māmeva praviśanti te || dattaṃ japtaṃ hutaṃ ceṣṭaṃ tapastaptaṃ kṛtaṃ ca yat | dhyānamadhyayanaṃ jñānaṃ sarvaṃ tatrākṣayaṃ bhavet || janmāntarasahasreṣu yat pāpaṃ pūrvasañcitam | avimuktaṃ praviśatastatsarvaṃ vrajati kṣayam || brāhmaṇāḥ kṣatriyā vaiśyāḥ śūdrā ye varṇasaṅkarāḥ | striyo mlecchāśca ye cānye saṅkīrṇāḥ pāpayonayaḥ || kīṭāḥ pipīlikāścaiva ye cānye mṛgapakṣiṇaḥ | kālena nidhanaṃ prāptā avimukte varānane || candrārddhamaulayarutryakṣā mahāvṛṣabhavāhanāḥ | śive mama pure devi jāyante tatra mānavāḥ || nāvimukte mṛtaḥ kaścinnarakaṃ yāti kilbiṣī | īśvarānugṛhītā hi sarve yānti parāṃ gatim || mokṣaṃ sudurllabhaṃ matvā saṃsāraṃ cātibhīṣaṇam | aśmanā caraṇau hatvā vārāṇasyāṃ vasennaraḥ || durlabhā tapasā caiva pūtasya parameśvari | yatra tatra vipannasya gatiḥ saṃsāramokṣaṇī || prasādājjāyate hyetanmama śailendranandini | aprabuddhā na paśyanti mama māyāvimohitāḥ || avimuktaṃ na sevanti mūḍhā ye tamasāvṛtāḥ | viṇmūtraretasāṃ madhye te vasanti punaḥ punaḥ || hanyamāno'pi yo vidvānvasedvighnaśatairapi | sa yāti paramaṃ sthānaṃ yatra gatvā na śocati || janmamṛtyujarāmuktaṃ paraṃ yāti śivālayam | apunarmaraṇānāṃ hi sā gatirmokṣakāṅkṣiṇām || yāṃ prāpya kṛtakṛtyaḥ syāditi manyanti paṇḍitāḥ | na dānairna tapobhiśca na yajñairnāpi vidyayā || prāpyate gatirutkṛṣṭā yā'vimukte tu labhyate | nānāvarṇā vivarṇāśca caṇḍālāśca jugupsitāḥ || kilviṣaiḥ pūrṇadehā ye viśiṣṭaiḥ pātakaistathā | bheṣajaṃ paramaṃ teṣāmavimuktaṃ vidurbudhāḥ || avimuktaṃ paraṃ jñānamavimuktaṃ paraṃ padam | avimuktaṃ paraṃ tattvamavimuktaṃ paraṃ śivam || kṛtvā vai naiṣṭhikīṃ dīkṣāmavimukte vasanti ye